పెట్టుబడి అంటే తప్పనిసరిగా రిస్క్ ఉంటుంది. కానీ అన్ని పెట్టుబడులూ ఒకే స్థాయి రిస్క్ కలిగి ఉండవు. కొన్నింటిలో లాభం తక్కువైనా, భద్రత ఎక్కువగా ఉంటుంది. ఈ వర్గం పెట్టుబడులు ఎక్కువగా రిస్క్ను కలిగి ఉంటాయి. తక్కువ రాబడిని అందిస్తాయి. మరోవైపు బ్యాంకు వడ్డీరేట్లు కూడా తగ్గిపోవడంతో పెట్టుబడిదారులు అధిక రాబడి ఇచ్చే మార్గాలవైపు మొగ్గు చూపుతున్నారు. అయితే ఎక్కువ రాబడి వస్తే రిస్క్ కూడా తప్పదని నిపుణులు హెచ్చరిస్తున్నారు. రిస్క్ లేకుండా రిటర్న్ ఉండదు అన్న నానుడి పెట్టుబడుల్లో సరిగ్గా సరిపోతుంది. రిస్క్ ఉన్నా.. బలమైన ఫండమెంటల్స్ ఉన్న పెట్టుబడులు దీర్ఘకాలంలో మంచి లాభాలకే దారితీస్తాయి. పెట్టుబడిదారులు తమ రిస్క్ బేరింగ్ కెపాసిటీని అంచనా వేసుకుని ముందుకు వెళ్లడం ఉత్తమం.
స్టాక్ మార్కెట్ ..Stock Market
నేరుగా షేర్లలో పెట్టుబడి పెట్టడం వల్ల రిస్క్ ఎక్కువగా ఉన్నా.. దీర్ఘకాలంలో మంచి లాభాలు వస్తాయి. బలమైన కంపెనీల ఫండమెంటల్స్ చూసి, 5–10 ఏళ్ల దృష్టితో పెట్టుబడి పెడితే డివిడెండ్లు, క్యాపిటల్ గెయిన్స్ రూపంలో మంచి రాబడి దక్కవచ్చు. కానీ తక్షణ మార్పులతో భయపడకుండా ఉండటం ముఖ్యం.
ఈక్విటీ మ్యూచువల్ ఫండ్లు..Equity Mutual Funds
నేరుగా షేర్లను కొనలేని వారికి ఈక్విటీ మ్యూచువల్ ఫండ్లు ఉత్తమ ఎంపిక. ఇక్కడ ప్రొఫెషనల్ ఫండ్ మేనేజర్లు పెట్టుబడులను నిర్వహిస్తారు. మార్కెట్ రిస్క్ ఉన్నా, దీర్ఘకాలంలో (7–10 ఏళ్లు) బ్యాంకు వడ్డీల కంటే రెట్టింపు లాభాలు పొందే అవకాశం ఉంది. ఫ్లెక్సీ క్యాప్, మిడ్క్యాప్, స్మాల్క్యాప్ ఫండ్లు ఎక్కువ రిస్క్తోపాటు ఎక్కువ రాబడిని ఇచ్చే వర్గాల్లో ఉంటాయి.
రియల్ ఎస్టేట్ ..Real Estate
ప్రాపర్టీల ధరలు స్థిరంగా పెరుగుతున్న నేపథ్యంలో రియల్ ఎస్టేట్ పెట్టుబడులు కూడా రాబడికి మంచి మార్గం. అయితే లిక్విడిటీ తక్కువగా ఉండటంతో వెంటనే డబ్బు కావాలంటే అమ్మడం కష్టం. సరిగ్గా స్థలం, ప్రాజెక్ట్ ఎంపిక చేస్తే 5–10 ఏళ్లలో బలమైన లాభాలు సాధ్యమే.
గోల్డ్ ETFలు, సిల్వర్ ఫండ్లు .. Gold ETFs and Silver Funds
బంగారం, వెండి వంటి విలువైన లోహాల్లో పెట్టుబడి రిస్క్ను తగ్గించే మార్గం అయినప్పటికీ.. ధరల ఊగిసలాట ఎక్కువగా ఉంటుంది. ETFల రూపంలో పెట్టుబడి పెడితే భద్రతతో పాటు సులభ లిక్విడిటీ కూడా లభిస్తుంది.
క్రిప్టో కరెన్సీలు ..Cryptocurrencies
నేటి తరానికి ఆకర్షణీయంగా కనిపిస్తున్న క్రిప్టో పెట్టుబడులు చాలా ఎక్కువ రిస్క్ కలిగినవే. నియంత్రణలు లేకపోవడం వల్ల ఏ సమయంలోనైనా విలువలు కుప్పకూలే అవకాశం ఉంటుంది. కాబట్టి చాలా చిన్న భాగం (5–10%) మాత్రమే ఇక్కడ పెట్టడం మంచిదని నిపుణులు సూచిస్తున్నారు.
రిస్క్ తక్కువగా ఉండే పథకాలు.. Low-Risk Investment Options
భద్రత కోరేవారికి PPF, NSC, FD, డెబ్ట్ ఫండ్లు వంటి పథకాలు ఉత్తమం. రిస్క్ తక్కువగా ఉండి, లాభం స్థిరంగా వస్తుంది. పెట్టుబడిదారులు తమ అవసరాలకు తగ్గట్టుగా మిశ్రమ పెట్టుబడి చేయడం మంచిది .
పబ్లిక్ ప్రావిడెంట్ ఫండ్ (PPF)
సాధారణ ప్రజల్లో అత్యంత ప్రాచుర్యం పొందిన దీర్ఘకాలిక పెట్టుబడి పథకం ఇది. ప్రభుత్వ హామీతో ఇది వస్తుంది కాబట్టి భద్రత గ్యారంటీ. ప్రస్తుతం 7%కు పైగా వార్షిక వడ్డీ లభిస్తోంది. 15 ఏళ్ల లాక్ఇన్ ఉన్నా, ట్యాక్స్ మినహాయింపు (80C) కారణంగా ఇది ఉత్తమ పెట్టుబడిగా పరిగణించబడుతోంది.
నేషనల్ సేవింగ్స్ సర్టిఫికేట్ (NSC)
పోస్టాఫీస్ ద్వారా అందించే మరో నమ్మదగిన పథకం ఇది. ఐదు సంవత్సరాల వ్యవధి కలిగి ఉంటుంది. రాబడి స్థిరంగా ఉండటమే కాకుండా, ఏటా వడ్డీ కూడా తిరిగి reinvest అవుతుంది. రిస్క్ తక్కువగా ఉండటంతో రిటైర్డ్ ఉద్యోగులు, సీనియర్ సిటిజన్లకు అనుకూలం.
రికరింగ్ డిపాజిట్లు (RD)
నెలనెలా చిన్న మొత్తంలో పొదుపు చేసే వారికి ఇది సరైన మార్గం. బ్యాంకులు, పోస్టాఫీసులు రెండింటిలో అందుబాటులో ఉంటుంది. వడ్డీ రేటు స్థిరంగా ఉంటుంది. తక్కువ రిస్క్, గ్యారంటీడ్ రిటర్న్స్తో మోస్తరు రాబడి కోరేవారికి అనువైన ఎంపిక.
డెబ్ట్ మ్యూచువల్ ఫండ్లు Debt Mutual Funds
ఈ ఫండ్లు ప్రధానంగా ప్రభుత్వ బాండ్లు, కార్పొరేట్ డెబ్ట్ పేపర్లలో పెట్టుబడి పెడతాయి. ఈక్విటీ ఫండ్లకన్నా రిస్క్ తక్కువగా ఉంటుంది. లిక్విడిటీ కూడా ఎక్కువ. షార్ట్టర్మ్, మల్టీ అసెట్, బ్యాలెన్స్డ్ అడ్వాంటేజ్ ఫండ్లు ఈ వర్గంలోకి వస్తాయి.
బ్యాంకు ఫిక్స్డ్ డిపాజిట్లు (FDs)
అత్యంత సురక్షిత పెట్టుబడులలో ఇది మొదటి స్థానంలో ఉంటుంది. రాబడి పరంగా పెద్ద లాభం లేకపోయినా, ప్రధాన పెట్టుబడి భద్రంగా ఉంటుంది. సీనియర్ సిటిజన్లకు అదనపు వడ్డీ కూడా లభిస్తుంది.
పోస్ట్ ఆఫీస్ మంత్లీ ఇన్కమ్ స్కీమ్ (MIS)
ప్రతినెలా స్థిరమైన ఆదాయం కోరేవారికి ఇది అద్భుతమైన పథకం. పెట్టుబడి చేసిన మొత్తంపై నెలనెలా వడ్డీ అందుతుంది. సీనియర్ సిటిజన్లకు వడ్డీ మరింత ఉంటుంది.
సీనియర్ సిటిజన్ సేవింగ్స్ స్కీమ్ (SCSS)
రిటైర్డ్ ఉద్యోగులకు ప్రత్యేకంగా రూపొందించిన ఈ పథకం ద్వారా భద్రతతో పాటు 8%కు పైగా వడ్డీ లభిస్తోంది. ప్రభుత్వ హామీ ఉన్నందున పూర్తి నమ్మకం కలిగించే పెట్టుబడి ఇది.
ఐపీఓ .. (Initial Public Offering)
స్టాక్ మార్కెట్లో కొత్త ఉత్సాహం నింపుతున్న పదం “ఐపీఓ” (Initial Public Offering). ఒక కొత్త కంపెనీ మొదటిసారి తన షేర్లను ప్రజలకు విక్రయించే ప్రక్రియ ఇదే. కొద్ది నెలలుగా ఈ ఐపీఓలపై పెట్టుబడిదారుల్లో గట్టి ఆసక్తి నెలకొంది. మంచి లిస్టింగ్ గెయిన్స్ వస్తాయనే ఆశతో చిన్నా,పెద్దా పెట్టుబడిదారులు ఇందులో ఇన్వెస్ట్ చేస్తున్నారు. తాజాగా కొందరు ఐపీఓలు లిస్టింగ్ రోజునే 40–50% వరకు లాభాలు ఇచ్చాయి. దీంతో పెట్టుబడిదారులు వీటిని “త్వరిత లాభాల” మార్గంగా చూస్తున్నారు. అయితే ప్రతి ఐపీఓ లాభాన్నే ఇస్తుందనే భ్రమలో పడకూడదని నిపుణులు హెచ్చరిస్తున్నారు. కంపెనీ ఫండమెంటల్స్, వాల్యుయేషన్, మార్కెట్ పరిస్థితులు ఇవన్నీ దృష్టిలో పెట్టుకోవాలి. బ్యాంకు లేదా బ్రోకరేజ్ యాప్ల ద్వారా ASBA (Application Supported by Blocked Amount) విధానంలో దరఖాస్తు చేయవచ్చు. డీమాట్ అకౌంట్ తప్పనిసరి. షేర్ అలాట్మెంట్ అయితే మాత్రమే డబ్బు డెబిట్ అవుతుంది. లేకపోతే తిరిగి రిలీజ్ అవుతుంది. ఐపీఓ పెట్టుబడులు రిస్క్ లేని మార్గం కావు. కొన్నిసార్లు లిస్టింగ్ రోజునే షేర్ ధర కిందకు పడిపోవచ్చు. కానీ సుదీర్ఘకాలం నిలబడే కంపెనీలను ఎంచుకుంటే మంచి లాభాలు సాధ్యమే. ఐపీఓల జోష్ కొనసాగుతున్నా.. పెట్టుబడిదారులు భావోద్వేగాలకు లోనుకాకుండా, ఆలోచించి అడుగులు వేయాలి. మంచి కంపెనీని ఎంచుకుంటే ఐపీఓ పెట్టుబడి బంగారు బాట అవుతుంది!
డైరెక్ట్ ఈక్విటీ .. Direct Equity
మ్యూచువల్ ఫండ్ల ద్వారా కాకుండా నేరుగా కంపెనీల షేర్లు కొనుగోలు చేయడమే డైరెక్ట్ ఈక్విటీ. పెట్టుబడిదారు స్వయంగా కంపెనీలను విశ్లేషించి, ఏ షేర్లలో పెట్టాలో నిర్ణయించుకోవాలి. మధ్య, దీర్ఘకాలంలో అధిక రాబడి సాధ్యమవుతుంది. ఇందులో మార్కెట్ ఊగిసలాట ఎక్కువ. సరైన కంపెనీని ఎంచుకోకపోతే నష్టాలు తప్పవు. డైరెక్ట్ ఈక్విటీలో విజయం సాధించాలంటే జ్ఞానం, ఓర్పు, పరిశీలన తప్పనిసరి. అని నిపుణులు సూచిస్తున్నారు.
మిడ్ క్యాప్ ఫండ్లు ..Mid-Cap Funds
మార్కెట్లో మిడ్ క్యాప్ కంపెనీలు అంటే మధ్యస్థాయి వ్యాపారాలు కలిగిన సంస్థలు. పెద్ద కంపెనీల స్థిరత్వం ఉండకపోయినా, వృద్ధి శక్తి ఎక్కువగా ఉంటుంది. పెద్ద కంపెనీలకన్నా ఇవి వేగంగా ఎదుగుతాయి. సరైన సమయంలో పెట్టుబడి పెడితే రెట్టింపు రాబడులు సాధ్యమే. అయితే మార్కెట్ కరెక్షన్లో ఎక్కువగా ఇవిపడిపోతాయి. ఇన్ఫోసిస్, హెచ్డీఎఫ్సీ బ్యాంక్ లాంటి దిగ్గజాలు కూడా తమ ప్రారంభ దశలో మిడ్ క్యాప్లే!
స్మాల్ క్యాప్ ఫండ్లు .. Small-Cap Funds
స్మాల్ క్యాప్ కంపెనీలు అంటే చిన్న మార్కెట్ విలువ ఉన్న సంస్థలు. ఇవి భవిష్యత్తులో ఎదుగుతాయనే ఆశతో పెట్టుబడిదారులు ఆసక్తి చూపుతారు. సరైన కంపెనీ అయితే లాభాలు 3 నుంచి 4 రెట్లు పెరుగవచ్చు. ఇందులో అనూహ్యంగా నష్టాలు వచ్చే అవకాశం కూడా ఎక్కువ. స్మాల్ క్యాప్ ఫండ్లు అనేవి యువ ఇన్వెస్టర్లకు ఎక్కువ అనుకూలం. దీర్ఘకాల దృష్టితో (5–10 ఏళ్లు) పెట్టుబడి పెడితే రిస్క్ సమతుల్యం అవుతుంది. మిడ్, స్మాల్ క్యాప్ ఫండ్లు దీర్ఘకాలానికి మంచి రాబడులు ఇస్తాయి. కానీ ఇవి అధిక రిస్క్ వర్గం. పెట్టుబడిదారులు ఆర్థిక సలహాదారుల సూచనతోనే ముందుకు వెళ్లడం ఉత్తమం.
