పెట్టుబడుల ప్రపంచంలో ఒక్కోసారి ఒక్కో పథకం ప్రత్యేకంగా వెలుగులోకి వస్తుంది. వాటిల్లో బాండ్లు ఒకటి. మొబైల్ ఫోన్లో కొన్ని నిమిషాల్లోనే బాండ్లను కొనగలిగే అవకాశాలు రావడంతో యువ పెట్టుబడిదారులు, సాంకేతిక పరిజ్ఞానం ఉన్నవారు వీటిపట్ల ప్రత్యేక ఆసక్తి చూపుతున్నారు. స్థిరమైన రాబడి, తక్కువ హెచ్చుతగ్గులు అనే ప్రత్యేకతల వల్ల వీటి డిమాండ్ రోజురోజుకు పెరుగుతోంది. ఈ నేపధ్యంలో సెక్యూరిటీస్ అండ్ ఎక్స్ఛేంజ్ బోర్డ్ ఆఫ్ ఇండియా (సెబీ) పెట్టుబడిదారులకు కొన్ని కీలక సూచనలను జారీ చేసింది. ముఖ్యంగా గుర్తింపు లేని లేదా నియంత్రణ లేకుండా సేవలు అందిస్తున్న డిజిటల్ ప్లాట్ఫారంలను తప్పించుకోవాలని స్పష్టంగా చెప్పింది. రాబడి ఎక్కువ చూపిస్తూ ఆకర్షించే సంస్థల జోలికి వెళ్లొద్దని హెచ్చరించింది.
మ్యూచువల్ ఫండ్లకు బలమైన పోటీ.. Strong Competition to Mutual Funds
నేటి పెట్టుబడిదారులు, ముఖ్యంగా నెలవారీగా రాబడి రావాలని కోరుకునేవారు, బాండ్లను మంచి ప్రత్యామ్నాయంగా చూస్తున్నారు. పెన్షన్ పొందుతున్నవారు, స్థిరమైన ఆదాయాన్ని కోరుకునే కుటుంబాలు, తక్కువ రిస్క్తో పెట్టుబడి పెట్టాలనుకునే వారు ఇలాంటి వర్గాలకు బాండ్లు నచ్చుతున్నాయి. గ్యారంటీతో కూడిన వడ్డీ రేట్లు, మార్కెట్ తరహా హెచ్చుతగ్గులు లేకపోవడం వీటి ప్రధాన ఆకర్షణ. అదే సమయంలో, కొన్ని బాండ్లు ఫిక్స్డ్ డిపాజిట్ల కంటే అధిక వడ్డీని అందించడం మరో ముఖ్య కారణం. డెట్ మ్యూచువల్ ఫండ్లకు బలమైన పోటీనిస్తున్నాయి.
డిజిటల్ బాండ్ ప్లాట్ఫారంలలో కనిపించే బాండ్లు .. Bonds Offered on Digital Bond Platforms
– కార్పొరేట్ బాండ్లు (ప్రధానంగా NBFCలు)
– ప్రభుత్వ సెక్యూరిటీలు (G-Secs)
– PSU బాండ్లు
బాండ్లు ఇచ్చే రాబడులు .. Returns Offered by Bonds
– AAA రేటింగ్ ఉన్న కార్పొరేట్ & ప్రభుత్వ బాండ్లు: 7% – 9%
-ఎన్బీఎఫ్సీ బాండ్లు: 10% – 12%
– ఫిక్స్డ్ డిపాజిట్ తరహా బాండ్లు: 5% – 6%
– ప్రభుత్వ సెక్యూరిటీలు (దీర్ఘకాలం): 6% – 7.5%
– PSU టాక్స్-ఫ్రీ బాండ్లు: 5.5% – 6.5%
రేటింగ్ ప్రకారం చూసుకుంటే.. Based on Credit Ratings…
– AAA రేటింగ్ – భద్రత ఎక్కువ
– C లేదా D రేటింగ్ ఉంటే రిస్క్ అత్యధికం . వాటికి దూరంగా ఉండాలి
ఈ జాగ్రత్తలు తప్పనిసరి.. These Precautions Are a Must
డిజిటల్ ప్లాట్ఫారంలను ఎంచుకునే ముందు ఈ జాగ్రత్తలు ఎంతో కీలకం. ప్రధానంగా సెబీ రిజిస్ట్రేషన్ ఉందో లేదో చూసుకోవాలి. స్టాక్ బ్రోకర్ రిజిస్ట్రేషన్ లేకుంటే వాటికి దూరంగా ఉండడం మంచిది. 12% కంటే ఎక్కువ రాబడి చూపిస్తే సందేహించాలి. 20% రాబడి చూపిస్తే అది స్పష్టమైన హెచ్చరికగా భావించాలి. స్థిర కంపెనీలు ఇంత అధిక రేట్లకు రుణాలు తీసుకోవు. కాబట్టి “అదిరే రాబడి” చూపించే బాండ్లు చాలా ప్రమాదకరం. ఇదే సమయంలో రేటింగ్లను గమనించాలి. రేటింగ్ ఏజెన్సీల రిపోర్టులు తప్పనిసరిగా చూడాలి. రేటింగ్ లేకుండా ఉన్న బాండ్లను అస్సలు ఎంచుకోవద్దు. సెబీ నిబంధనలకు మించి రాబడి హామీలిచ్చే సంస్థలు నమ్మదగినవి కావు.
బాండ్ల ప్రయోజనాలు.. Benefits of Investing in Bonds
స్థిరమైన రాబడి, రిస్క్ తక్కువగా ఉంటుంది. పెట్టుబడులకు ఇది వైవిధ్యమైన మార్గంగా చెప్పొచ్చు.
రిటైర్డ్ వారికి ఇవి అనుకూలం. పోర్ట్ఫోలియోలో బ్యాలెన్స్ కల్పించగలవు. బాండ్లలో పెట్టుబడి మంచిదే… కానీ జాగ్రత్త తప్పనిసరి. ఆర్థిక స్థిరత్వం, నెలవారీ ఆదాయం కోరుకునేవారికి బాండ్లు నిజంగా ఒక మంచి ఎంపిక. కానీ అధిక రేటింగ్, సెబీ అనుమతి ఉన్న ప్లాట్ఫారంలు, నమ్మకమైన సంస్థలు .. ఇవే భద్రతకు మార్గం. అధిక రాబడి కోసం రిస్క్ ఉన్న బాండ్లవైపు పరుగులు తీయకుండా… భద్రతకు ప్రాధాన్యం ఇవ్వడం ఉత్తమం. మీ పెట్టుబడి సురక్షితం కావాలంటే.. బాండ్లు కొనేటప్పుడు జాగ్రత్తలు తప్పనిసరి!
డివర్సిఫికేషన్ను మర్చిపోవద్దు .. Don’t Forget Diversification
అన్ని డబ్బులు బాండ్లలో పెట్టుబడి పెట్టడం తప్పు. 40% – ఈక్విటీ, 30% – డెట్/బాండ్లు, 20% – గోల్డ్, 10% – అత్యవసర నిధికి విభజించాలి.
లిక్విడిటీ రిస్క్ .. Liquidity Risk You Shouldn’t Ignore
స్టాక్ల మాదిరి బాండ్లలో ట్రేడింగ్ పెద్దగా ఉండదు. మీరు బాండ్ను అమ్మాలనుకున్నప్పుడు కొనుగోలుదారులు లేకపోవచ్చు. ఉన్నా సరైన ధర ఇవ్వకపోవచ్చు. ఇదే లిక్విడిటీ రిస్క్. చిన్న కంపెనీల బాండ్లలో ఈ సమస్య ఎక్కువగా కనిపిస్తుంది.
పన్నులు … Tax Implications to Keep in Mind
బాండ్ల నుంచి వచ్చే వడ్డీ మీ ఆదాయానికి జత కలిపి, మీ ట్యాక్స్ స్లాబ్ ప్రకారం పన్ను విధిస్తారు. మీరు 30% స్లాబ్లో ఉంటే వడ్డీపై 30% పన్ను చెల్లించాల్సి వస్తుంది.
రిస్క్ తగ్గించేందుకు ఏం చేయాలి? How to Reduce Risk While Investing in Bonds
బాండ్లను పూర్తిగా దూరం పెట్టాల్సిన అవసరం లేదు. కానీ కొన్ని జాగ్రత్తలు మాత్రం తప్పనిసరి. చిన్నకాల బాండ్లు ఎంచుకోవాలి. 1–5 సంవత్సరాల బాండ్లు వడ్డీ రిస్క్ను తగ్గిస్తాయి. ప్రభుత్వ బాండ్లకు ప్రాధాన్యం ఇవ్వాలి. సురక్షితత పరంగా G-Secs లేదా RBI బాండ్లు ఉత్తమం. కంపెనీ బాండ్లైతే రేటింగ్ తప్పనిసరిగా చూడాలి. AA, AAA రేటింగ్స్ ఉన్నవే ఎంచుకోవాలి. బాండ్ ఫండ్లలో పెట్టుబడి పెట్టడం మంచిది. ఒక్క బాండ్ను కొనడం కంటే బాండ్ మ్యూచువల్ ఫండ్లు సురక్షిత మార్గం. రేట్లు పెరుగుతున్న దశలో బాండ్లు దూరంగా పెట్టాలి. రేట్లు తగ్గే దశలో బాండ్లు మంచి రాబడిని ఇవ్వొచ్చు.
బాండ్లు ఎప్పుడు కొనడం మంచిది? Best Time to Invest in Bonds
స్టాక్ మార్కెట్ల ఒడిదుడుకులు పెరుగుతున్న వేళ, స్థిరమైన ఆదాయం అందించే పెట్టుబడుల కోసం ఎంతో మంది బాండ్ల వైపు మొగ్గు చూపుతున్నారు. అయితే బాండ్లు ఎప్పుడు కొనడం మంచిదనే ప్రశ్నకు.. ఆర్థిక నిపుణులు చెప్పే సమాధానం ఇలా ఉంది… బాండ్ల ధరలు–వడ్డీ రేట్లు ఒకదానికి ఒకటి విరుద్ధంగా కదలడం సర్వసాధారణం. వడ్డీ రేట్లు తగ్గే అవకాశం ఉన్నప్పుడు బాండ్ ధరలు పెరుగుతాయి. అప్పుడు బాండ్లు కొనుగోలు చేస్తే మదుపరులకు మంచిదని నిపుణులు చెబుతున్నారు. ఆర్బీఐ సమావేశాల్లో వడ్డీ కోతల సూచనలు కనబడితే, ఆ సమయం బాండ్ పెట్టుబడికి అనువైనదిగా సూచిస్తున్నారు. ద్రవ్యోల్బణం తగ్గే సంకేతాలు కూడా మరో మంచి సమయం. ద్రవ్యోల్బణం నియంత్రణలోకి వస్తే.. కేంద్ర బ్యాంకులు సాధారణంగా వడ్డీ కోతలకు మొగ్గు చూపుతాయి. అదే సమయంలో బాండ్ మార్కెట్లో ధరలు బలపడటమే కాకుండా, దీర్ఘకాల బాండ్లు మరింత ఆకర్షణీయంగా మారతాయి. ఈక్విటీ మార్కెట్లు కుదేలయ్యే సమయంలో స్థిర ఆదాయం కోరుకునే మదుపరులు బాండ్లలోకి మళ్లడం సాధారణం. జియోపాలిటికల్ టెన్షన్, ఆర్థిక మందగమనం ఊహలు, స్టాక్ మార్కెట్ ఒత్తిడి ఉన్నప్పుడు ప్రభుత్వ బాండ్లు, AAA రేటెడ్ కార్పొరేట్ బాండ్లకు డిమాండ్ పెరుగుతుంది. మార్కెట్లో యీల్డ్స్ పెరిగితే బాండ్ ధరలు తాత్కాలికంగా తగ్గుతాయి. ఇది కొత్తగా ప్రవేశించే పెట్టుబడిదారులకు గోల్డెన్ ఛాన్స్. ఉదాహరణకు 10 ఏళ్ల గవర్నమెంట్ బాండ్ యీల్డ్ 7.5% దాటితే, చాలా మంది మదుపరులు దీన్ని కొనుగోలు అవకాశంగా భావిస్తారు.
బాండ్లులో ఎంతమొత్తంలో పెట్టుబడులు పెట్టాలి? How Much Should You Invest in Bonds?
బాండ్లులో ఎంత మొత్తం పెట్టాలనే విషయంలో ఒకే ఒక సూత్రం అందరికీ సరిపోదు. ఎందుకంటే వయసు, ఆదాయం, రిస్క్ తీసుకునే సామర్థ్యం, పెట్టుబడి లక్ష్యాలు, లిక్విడిటీ అవసరం వీటన్నింటినీ బట్టి బాండ్ కేటాయింపు మారుతుంది. అయితే కొన్ని సామాన్యమైన నియమాలు మాత్రం పెట్టుబడిదారులకు సరైన మార్గదర్శకంగా ఉపయోగపడతాయి. వయస్సు పెరిగే కొద్దీ బాండ్ వాటా పెంచాలి. ఉదాహరణకు వయస్సు 40 అయినవారికి ఈక్విటీ: 60%, బాండ్లు/డెట్: 40%, వయస్సు 55 అయితే ఈక్విటీ: 45%, బాండ్లు: 55% మేర పెట్టుబడులు పెట్టాలి. రిస్క్ తట్టుకోలేని వారికి పోర్ట్ఫోలియోలో 50–70% వరకు బాండ్లు సరిపోతాయి. రిస్క్ తీసుకునే వారికి 20–30% బాండ్ కేటాయింపు సరిపోతుంది. మీ లక్ష్యం 3–5 సంవత్సరాల్లో పూర్తి కావాల్సినదే అయితే, ఈక్విటీకి వెళ్లే ముందు బాండ్లు ప్రధాన పాత్ర పోషిస్తాయి. ఉదాహరణకు పిల్లల విద్య, ఇల్లు కట్టుకోవడం, పెళ్లి ఖర్చులు, షార్ట్-టెర్మ్ సేవింగ్ ప్లాన్స్ ఇలాంటి వాటికి 60–80% వరకూ డెట్/బాండ్లు పెట్టడం మంచిది. దీర్ఘకాలిక లక్ష్యాలు అంటే రిటైర్మెంట్ సేవింగ్స్ 15–20 సంవత్సరాల పెట్టుబడులు అయితే 30–40% బాండ్లు చాలు.
