హైదరాబాద్ః దేశ ఆర్థిక వ్యవస్థను బలోపేతం చేసే దిశగా బంగారం కొనుగోళ్లను (Gold investment) ఏడాది పాటు వాయిదా వేసుకోవాలని ప్రధానమంత్రి నరేంద్ర మోదీ ప్రజలకు విజ్ఞప్తి చేశారు. అయితే, దీని అర్థం బంగారంలో పెట్టుబడులు పెట్టడం పూర్తిగా ఆపేయాలని కాదు. సాంప్రదాయ పద్ధతిలో కొనే ఆభరణాలు, నాణేలు, కడ్డీల స్థానంలో డిజిటల్ లేదా ఫైనాన్షియల్ గోల్డ్ వైపు అడుగులు వేయాలని దీని ముఖ్య ఉద్దేశం. దీనివల్ల దేశంపై దిగుమతి భారం (Gold investment) తగ్గడమే కాకుండా, పసిడి ధరల పెరుగుదల ద్వారా వచ్చే లాభాలను మదుపరులు పూర్తిగా అందుకోవచ్చు. భారతీయ కుటుంబాలకు బంగారంపై ఉన్న మక్కువ ప్రత్యేకమైనది. పండగలు, పెళ్లిళ్లు, శుభకార్యాలకు బంగారం కొనడం ఇక్కడ ఒక సంప్రదాయం. అయితే, ఇన్వెస్ట్మెంట్ కోణంలో చూసినప్పుడు మీ మొత్తం పోర్ట్ఫోలియోలో (Investment Portfolio) బంగారం వాటా కేవలం 10 నుంచి 15 శాతం మాత్రమే ఉండాలని ఫైనాన్షియల్ ప్లానర్లు సూచిస్తున్నారు. మార్కెట్ ఒడుదొడుకులు (Market Volatility), ద్రవ్యోల్బణం (Inflation) నుంచి మీ పెట్టుబడులకు ఒక రక్షణ కవచంగా (Hedge) మాత్రమే బంగారాన్ని ఉపయోగించుకోవాలి.
ప్రస్తుత డిజిటల్ యుగంలో సామాన్యుడికి సైతం అందుబాటులో ఉన్న ఆధునిక పసిడి పెట్టుబడి మార్గాలివే..
తేలికైన మార్గం: గోల్డ్ ఈటీఎఫ్లు (Gold ETFs)
డిజిటల్ పద్ధతిలో బంగారంలో మదుపు చేయాలనుకునే వారికి గోల్డ్ ఎక్స్ఛేంజ్ ట్రేడెడ్ ఫండ్స్ (Gold ETFs) అత్యంత ప్రజాదరణ పొందిన మార్గం. ఇవి పూర్తిగా మార్కెట్లోని భౌతిక బంగారం ధరల ఆధారంగా పనిచేస్తాయి.
ట్రేడింగ్ విధానం: మీ వద్ద డీమ్యాట్ ఖాతా (Demat Account) ఉంటే చాలు, స్టాక్ మార్కెట్లో షేర్లను కొని, అమ్మినట్లే ట్రేడింగ్ వేళల్లో ఈ గోల్డ్ ఈటీఎఫ్ యూనిట్లను సులభంగా కొనుగోలు చేయవచ్చు.
సేఫ్టీ, ప్యూరిటీ: మీరు ఆన్లైన్లో కొనే ప్రతి యూనిట్కు సమానమైన స్వచ్ఛమైన బంగారాన్ని అసెట్ మేనేజ్మెంట్ కంపెనీలు సురక్షితమైన లాకర్లలో భద్రపరుస్తాయి. కాబట్టి దొంగతనం భయం కానీ, ప్యూరిటీ (Purity) గురించిన ఆందోళన కానీ ఉండవు.
తక్కువ ఖర్చు: ఆభరణాల రూపంలో కొనేటప్పుడు ఉండే తయారీ ఖర్చులు, తరుగు (Wastage), లాకర్ ఛార్జీలు ఇందులో ఉండవు. కేవలం 0.01 గ్రాము లేదా 1 గ్రాము పెట్టుబడితో కూడా దీనిని ప్రారంభించవచ్చు.
లిక్విడిటీ (Liquidity): అత్యవసర సమయంలో వీటిని క్షణాల్లో స్టాక్ మార్కెట్లో అమ్మి నగదుగా మార్చుకోవచ్చు. అయితే, మీ బ్యాంక్ ఖాతాలోకి నగదు మాత్రమే వస్తుంది, భౌతిక బంగారం డెలివరీ లభించదు.
పన్ను నిబంధనలు (Taxation): ఈటీఎఫ్ యూనిట్లను 12 నెలల లోపు విక్రయిస్తే వచ్చే లాభాలను స్వల్పకాలిక మూలధన లాభాలు (Short-Term Capital Gains – STCG)గా పరిగణించి మీ ఆదాయపు పన్ను స్లాబ్ (Income Tax Slab) ప్రకారం పన్ను విధిస్తారు. ఒకవేళ 12 నెలలు దాటిన తర్వాత విక్రయిస్తే దీర్ఘకాలిక మూలధన లాభాల కింద (Long-Term Capital Gains – LTCG) 12.5% పన్ను చెల్లించాల్సి ఉంటుంది.
వైవిధ్యమైన వ్యూహం: మల్టీ అసెట్ అలోకేషన్ ఫండ్లు (Multi-Asset Allocation Funds)
పెట్టుబడిని ఒకే చోట కాకుండా వేర్వేరు సాధనాల్లో విస్తరించాలనుకునే వారికి మల్టీ అసెట్ ఫండ్స్ సరైన ఎంపిక. ఇవి మీ పెట్టుబడిని ఈక్విటీ (Equity – షేర్లు), డెట్ (Debt – బాండ్లు), కమోడిటీస్ (Commodities – బంగారం, వెండి) వంటి వివిధ రంగాలలో ఇన్వెస్ట్ చేస్తాయి.
రిస్క్ మేనేజ్మెంట్: మార్కెట్ పరిస్థితులను బట్టి ఏ రంగానికి ఎంత కేటాయించాలనేది ఎక్స్పర్ట్ ఫండ్ మేనేజర్లు (Fund Managers) నిర్వస్తారు. షేర్ మార్కెట్ పతనమైనప్పుడు బంగారం మీ పెట్టుబడిని కాపాడుతుంది.
పరిమితి: ఒకవేళ మీ పోర్ట్ఫోలియోలో కచ్చితంగా 10-15 శాతం బంగారం మాత్రమే ఉండాలని టార్గెట్ పెట్టుకుంటే, ఈ ఫండ్ల ద్వారా అది కచ్చితంగా సాధ్యం కాకపోవచ్చు. ఎందుకంటే ఫండ్ మేనేజర్లు మార్కెట్ ట్రెండ్ను బట్టి గోల్డ్ వాటాను మారుస్తూ ఉంటారు.
నేరుగా బంగారమే మీ చేతికి: ఎలక్ట్రానిక్ గోల్డ్ రిసీట్స్ (EGRs)
మార్కెట్ నియంత్రణ సంస్థ సెబీ (SEBI) నిబంధనల ప్రకారం.. నేషనల్ స్టాక్ ఎక్స్ఛేంజ్ (NSE) ఇటీవల ఎలక్ట్రానిక్ గోల్డ్ రిసీట్స్ (Electronic Gold Receipts – EGR) అనే సరికొత్త విధానాన్ని అందుబాటులోకి తెచ్చింది. భౌతిక బంగారానికి ఇది అత్యంత సురక్షితమైన ప్రత్యామ్నాయం.
పనిచేసే విధానం: గోల్డ్ ఈటీఎఫ్లలో ఫండ్ మేనేజర్ల ద్వారా బంగారం కొనుగోలు జరిగితే, ఈజీఆర్ (EGR) విధానం పూర్తిగా భిన్నంగా ఉంటుంది. ఇక్కడ సెబీ ఆమోదించిన బ్యాంకులు లేదా బులియన్ వ్యాపారులు ముందుగా బంగారాన్ని వాల్ట్లలో (Vaults) డిపాజిట్ చేస్తారు. ఆ బంగారానికి మద్దతుగా వాల్ట్ మేనేజర్లు ఎలక్ట్రానిక్ రసీదులను జారీ చేస్తారు. అంటే, వాల్ట్లో ఉన్న డిజిటల్ బంగారంపై మీకు డైరెక్ట్ యాజమాన్య హక్కు (Ownership Right) లభిస్తుంది.
ఫ్లెక్సిబుల్ ట్రేడింగ్ టైమింగ్స్: ఎన్ఎస్ఈ ప్లాట్ఫారమ్లో సోమవారం నుండి శుక్రవారం వరకు ఉదయం 9:00 గంటల నుండి రాత్రి 11:30 గంటల వరకు వీటిని ట్రేడ్ చేయవచ్చు. ఈ పొడిగించిన సమయం (Extended Trading Hours) వల్ల అంతర్జాతీయ మార్కెట్లో రాత్రి వేళల్లో వచ్చే ధరల మార్పులకు అనుగుణంగా మదుపరులు తక్షణ నిర్ణయాలు తీసుకోవచ్చు.
స్వచ్ఛత, పరిమాణం: ఈ ప్లాట్ఫారమ్లో పసిడి EGR-999, EGR-995 అనే రెండు అత్యుత్తమ ప్యూరిటీ ప్రమాణాలతో లభిస్తుంది. సామాన్యులకు సైతం అందుబాటులో ఉండేలా కనీసం 100 మిల్లీగ్రాముల (0.1 గ్రాము) నుండి గరిష్టంగా 1 కిలో వరకు కొనుగోలు చేసే వెసులుబాటు ఉంది. దేశవ్యాప్తంగా వన్ నేషన్ వన్ ప్రైస్ (One Nation One Price) విధానంలో ఒకే ధర ఉంటుంది.
భౌతిక బంగారం డెలివరీ: ఈజీఆర్ లో ఉన్న అతిపెద్ద ప్లస్ పాయింట్ ఏంటంటే.. మీకు అవసరమైనప్పుడు మీ వద్ద ఉన్న డిజిటల్ రసీదులను సమర్పించి, దానికి సమానమైన నిజమైన బంగారాన్ని నిర్దేశిత వాల్ట్ల నుండి లేదా అధీకృత జ్యువెలరీ షాపుల నుండి ఫిజికల్ డెలివరీ (Physical Delivery) తీసుకోవచ్చు.
టాక్స్ ప్రయోజనం: డిజిటల్ రసీదుల రూపంలో కొనుగోలు చేసినప్పుడు ఎలాంటి జీఎస్టీ (GST) ఉండదు. కేవలం వాటిని నిజమైన బంగారంగా మార్చుకునే (Physical Conversion) సమయంలో మాత్రమే జీఎస్టీ, నామమాత్రపు కన్వర్షన్ ఛార్జీలు చెల్లించాల్సి ఉంటుంది.
మీ రిస్క్ ప్రొఫైల్కు ఏది బెస్ట్? (Which one to choose?)
ఈజీఆర్ (EGR): భవిష్యత్తులో (పిల్లల పెళ్లిళ్లు లేదా ఇతర అవసరాల కోసం) కచ్చితంగా ఫిజికల్ గోల్డ్ చేతికి కావాలి, కానీ ప్రస్తుతానికి దొంగల భయం, జీఎస్టీ, తరుగు లేకుండా సురక్షితంగా దాచుకోవాలి అనుకునే వారికి ఇది బెస్ట్ ఛాయిస్.
గోల్డ్ ఈటీఎఫ్ (Gold ETF): మాకు భౌతిక బంగారం అవసరం లేదు, కేవలం పసిడి ధరలు పెరిగినప్పుడు వచ్చే లాభాలు (Capital Appreciation), సులభంగా నగదుగా మార్చుకునే వెసులుబాటు కావాలనుకునే వారికి ఇది ఉత్తమ మార్గం.
మల్టీ అసెట్ ఫండ్స్ (Multi-Asset Funds): ఒకే చోట కాకుండా ఈక్విటీ, డెట్, బంగారం మూడు విభాగాల్లో నిపుణుల పర్యవేక్షణలో ఇన్వెస్ట్ చేయాలనుకునే వారికి ఇది సరైన ప్రత్యామ్నాయం.
రిస్క్ తగ్గించి.. మంచి రాబడుల కోసం: ‘కెమిస్ట్రీ ఆఫ్ ఇన్వెస్టింగ్’ (Chemistry of Investing)
చాలా మంది ఇన్వెస్టర్లలో పోర్ట్ఫోలియోలో ఈక్విటీలు లేదా ఇతర రిస్క్ అసెట్స్ ఎక్కువ ఉంటే నష్టభయం పెరుగుతుందనే అపోహ ఉంటుంది. దీనిపై ‘వైట్ ఓక్ క్యాపిటల్’ (White Oak Capital) సంస్థ ‘కెమిస్ట్రీ ఆఫ్ ఇన్వెస్టింగ్’ పేరిట ఒక ఆసక్తికరమైన రీసెర్చ్ స్టడీని నిర్వహించింది. సెప్టెంబర్ 2001 నుండి ఏప్రిల్ 2026 మధ్య కాలంలోని రోలింగ్ ఏడాది రాబడుల (Rolling Returns) ఆధారంగా క్రిసిల్ 10-ఇయర్ గిల్ట్ ఇండెక్స్ (Debt), బీఎస్ఈ సెన్సెక్స్ టోటల్ రిటర్న్ ఇండెక్స్ (Equity)లను ప్రామాణికంగా తీసుకుని ఈ విశ్లేషణ చేశారు. ఆ వివరాలు కింది విధంగా ఉన్నాయి.
ఒకవేళ పెట్టుబడిదారుడు తన సొమ్మును పూర్తి 100 శాతం కేవలం డెట్ (Debt) సాధనాల్లోనే మదుపు చేస్తే సగటు వార్షిక రాబడి 6.83 శాతంగా నమోదైంది. ఈ విధానంలో హెచ్చుతగ్గుల రిస్క్ (Volatility) 6.38 శాతంగా ఉంది.
ఈ వ్యూహాన్ని కాస్త మార్చి.. 90 శాతం డెట్ నిధులకు 10 శాతం ఈక్విటీని జోడించినప్పుడు ఆశ్చర్యకరమైన ఫలితాలు వచ్చాయి. ఇందులో రాబడి రేటు 8.05 శాతానికి పెరగడమే కాకుండా, నష్టభయం లేదా రిస్క్ శాతం 5.74 శాతానికి పడిపోయింది.
ఇక మూడో వ్యూహం కింద అసెట్ అలోకేషన్ మరింత మెరుగ్గా చేశారు. ఇందులో డెట్ వాటా 55 శాతం, ఈక్విటీల వాటా 25 శాతం కేటాయించారు. వీటికి అదనంగా మూడో సాధనంగా బంగారాన్ని (Gold) 20 శాతం మేర జోడించారు. ఈ తరహా మల్టీ అసెట్ పోర్ట్ఫోలియో ద్వారా అత్యధికంగా 11.61 శాతం వార్షిక రాబడి లభించింది. రిస్క్ కూడా పూర్తిగా సమతుల్యంగా మారింది. ఈ గణాంకాలను బట్టి చూస్తే కేవలం ఒకే రంగంలో కాకుండా బంగారం, ఈక్విటీలను కలపడం వల్ల సంపద వేగంగా పెరుగుతుందని స్పష్టమవుతోంది.
సాంప్రదాయకంగా లాకర్లలో బంగారం దాచే రోజులు మారాయి. దేశ ఆర్థిక వ్యవస్థకు సహకరిస్తూనే, మీ సంపదను సురక్షితంగా పెంచుకోవడానికి ఇలాంటి డిజిటల్ పసిడి మార్గాలను పరిశీలించడం నేటి కాలంలో ఎంతో స్మార్ట్ నిర్ణయం!
About the Author
