దేశంలో పెట్రోల్లో ఇథనాల్ మిశ్రమాన్ని క్రమంగా పెంచుతూ ఇంధన దిగుమతులపై ఆధారాన్ని తగ్గించాలన్న లక్ష్యంతో కేంద్ర ప్రభుత్వం ముందుకు సాగుతోంది. ఇప్పటికే దేశవ్యాప్తంగా ఇ20 (80 శాతం పెట్రోల్ + 20 శాతం ఇథనాల్) ఇంధనం అందుబాటులోకి తీసుకొచ్చిన ప్రభుత్వం, భవిష్యత్తులో ఇ25, ఇ27, ఇ30 వంటి అధిక ఇథనాల్ మిశ్రమ ఇంధనాల వినియోగానికి కూడా మార్గం సుగమం చేస్తోంది. అయితే ఇ20పై ఇప్పటికే కొన్ని వర్గాల నుంచి వస్తున్న విమర్శలు, వాహనదారుల్లో నెలకొన్న సందేహాల నేపథ్యంలో ఇ25 అమలుపై (E25 Petrol) ప్రభుత్వం ఆచితూచి అడుగులు వేయనున్నట్లు సంకేతాలు కనిపిస్తున్నాయి. పెట్రోలులో ఇథనాల్ శాతం పెరిగే కొద్దీ వాహనాల మైలేజీ తగ్గుతుందా? ఇంజిన్పై ప్రభావం ఉంటుందా? పాత వాహనాలు ఈ ఇంధనాన్ని తట్టుకోగలవా? లేక కొత్త తరహా ఇంజిన్లే అవసరమా? అనే ప్రశ్నలు ప్రస్తుతం ఆటోమొబైల్ రంగంలో చర్చనీయాంశంగా మారాయి. అయితే ప్రభుత్వం, చమురు సంస్థలు, వాహన తయారీ కంపెనీలు, పరిశ్రమ నిపుణులు చెబుతున్న విషయాలను పరిశీలిస్తే వాస్తవ పరిస్థితి కొంత భిన్నంగా కనిపిస్తోంది.
ఇ20 తర్వాత ఇ25పై దృష్టి.. The Next Step After E20
భారత్ ప్రపంచంలోనే అత్యంత వేగంగా ఇథనాల్ (E25 Petrol)బ్లెండింగ్ను అమలు చేస్తున్న దేశాల్లో ఒకటిగా నిలిచింది. మొదట 5 శాతం, తర్వాత 10 శాతం, అనంతరం 20 శాతం ఇథనాల్ కలిపిన పెట్రోల్ను దేశవ్యాప్తంగా అందుబాటులోకి తీసుకొచ్చింది. వాస్తవానికి 2030 నాటికి ఈ లక్ష్యాన్ని చేరుకోవాలని ప్రభుత్వం నిర్ణయించినప్పటికీ, దాదాపు ఐదేళ్ల ముందుగానే ఇ20 అమలును పూర్తి చేసింది. ఇక తదుపరి దశగా ఇ22, ఇ25, ఇ27, ఇ30 వంటి అధిక ఇథనాల్ మిశ్రమాలకు సంబంధించిన భారత ప్రమాణాలను కూడా ఇటీవల ప్రభుత్వం నోటిఫై చేసింది. అయితే ఇ25 అమలుకు మాత్రం ఇప్పటివరకు ఎలాంటి గడువు ప్రకటించలేదు. ఇందుకు ప్రధాన కారణం ఇ20పై జరుగుతున్న చర్చలు, ప్రజల్లో నెలకొన్న సందేహాలేనని పరిశ్రమ వర్గాలు చెబుతున్నాయి.
సిద్ధమైన చమురు సంస్థలు.. Oil Companies Ready for E25
ఇ25 ఇంధనం (E25 Petrol) సరఫరా చేయడానికి అవసరమైన మౌలిక వసతులను ప్రభుత్వ రంగ చమురు రిఫైనరీలు ఇప్పటికే సిద్ధం చేశాయి. నిల్వ కేంద్రాలు, పంపిణీ వ్యవస్థలు, బ్లెండింగ్ యూనిట్లు వంటి సదుపాయాలు దాదాపు పూర్తి స్థాయిలో అందుబాటులో ఉన్నాయని సమాచారం. అంటే ప్రభుత్వం గ్రీన్సిగ్నల్ ఇస్తే వెంటనే ఇ25 సరఫరా ప్రారంభించే సామర్థ్యం ఆయిల్ మార్కెటింగ్ కంపెనీలకు ఉంది. అయితే కేవలం మౌలిక వసతులు సిద్ధంగా ఉండటమే సరిపోదని, వాహనాల అనుకూలత, వినియోగదారుల ప్రయోజనాలు, సాంకేతిక అంశాలన్నింటినీ సమగ్రంగా పరిశీలించిన తర్వాతే ప్రభుత్వం తుది నిర్ణయం తీసుకునే అవకాశం ఉంది.
ఇ20పై ఎందుకు చర్చ? Why Is E20 Being Debated?
ఇ20 పెట్రోల్ (E20 Petrol)అమల్లోకి వచ్చిన తర్వాత కొందరు వినియోగదారులు మైలేజీ తగ్గిందని అభిప్రాయపడుతుండగా, మరికొందరు పాత వాహనాల్లో ఇంజిన్ పనితీరుపై ఆందోళన వ్యక్తం చేస్తున్నారు. ఈ చర్చలకు ఇటీవల కోర్టు విచారణలో అటార్నీ జనరల్ చేసిన వ్యాఖ్యలు మరింత ఊతమిచ్చాయి. ఇ20ను ప్రస్తుతం ఒక ప్రయోగాత్మక దశగా చూడాల్సి ఉంటుందని, దీని పూర్తి ప్రభావం మరికొంత కాలం తర్వాతే స్పష్టమవుతుందని ఆయన పేర్కొనడం చర్చకు దారితీసింది. దీంతో సామాజిక మాధ్యమాల్లో అనేక ప్రచారాలు కూడా మొదలయ్యాయి. అయితే ఈ వ్యాఖ్యలను చమురు శాఖ మంత్రి హర్దీప్ సింగ్ పురి పూర్తిగా ఖండించారు. ఇప్పటివరకు ఇ20 కారణంగా వాహన ఇంజిన్లకు ఎలాంటి సమస్యలు తలెత్తినట్లు ప్రభుత్వానికి ఆధారాలు లేవని ఆయన స్పష్టం చేశారు.
మైలేజీపై ప్రభావం ఉంటుందా? Will Fuel Efficiency Come Down?
ఇథనాల్లోని శక్తి సాంద్రత (ఎనర్జీ డెన్సిటీ) సాధారణ పెట్రోల్తో పోలిస్తే కొంత తక్కువగా ఉంటుంది. అందువల్ల ఇథనాల్ శాతం పెరిగే కొద్దీ మైలేజీ స్వల్పంగా తగ్గే అవకాశం ఉంటుందని పరిశ్రమ నిపుణులు అంగీకరిస్తున్నారు. గ్రెయిన్ ఇథనాల్ మాన్యుఫాక్చరర్స్ అసోసియేషన్ అధ్యక్షుడు సీకే జైన్ అభిప్రాయం ప్రకారం, ఇ20 వినియోగంతో వాహనాల మైలేజీ సుమారు 3 నుంచి 7 శాతం వరకు తగ్గే అవకాశం ఉంది. అయితే ఇది ప్రతి వాహనంలో ఒకేలా ఉండదని, ఇంజిన్ రూపకల్పన, డ్రైవింగ్ అలవాట్లు, నిర్వహణ వంటి అంశాలపై కూడా ఆధారపడి ఉంటుందని ఆయన పేర్కొంటున్నారు. అంటే మైలేజీలో స్వల్ప తేడా కనిపించినా అది వాహనానికి నష్టం జరిగిందని భావించాల్సిన అవసరం లేదని నిపుణులు చెబుతున్నారు.
పాత వాహనాలకు సమస్యేనా? What About Older Vehicles?
అధిక ఇథనాల్ (E25 Petrol)మిశ్రమం కోసం ప్రత్యేకంగా రూపొందించని పాత తరహా వాహనాల్లో కొన్ని సమస్యలు తలెత్తే అవకాశం ఉందని ఆటోమొబైల్ పరిశ్రమ అంగీకరిస్తోంది. ఇంధన పైపులు, రబ్బరు భాగాలు, ఇంధన పంపులు, ఇంజిన్లోని కొన్ని విడిభాగాలు అధిక ఇథనాల్ను తట్టుకునే విధంగా తయారు చేయకపోతే కాలక్రమంలో అరుగుదల పెరగవచ్చు. నిర్వహణ ఖర్చులు కూడా కొంత పెరిగే అవకాశం ఉంటుంది. అందుకే కొన్ని వాహన తయారీ సంస్థలు ఇ20 ఇంధనాన్ని నిర్దిష్ట మోడళ్లలో మాత్రమే వినియోగించాలని ఇప్పటికే వినియోగదారులకు సూచించాయి. కొత్త తరం బీఎస్-6, ఫ్లెక్స్-ఫ్యూయల్ ఇంజిన్లు మాత్రం అధిక ఇథనాల్ మిశ్రమాన్ని దృష్టిలో పెట్టుకుని రూపొందించబడుతున్నాయి.
ఇ25 కోసం ఇంజిన్లలో మార్పులు తప్పవా? Engine Upgrades May Be Necessary
ఇ20 నుంచి ఇ25 (E25 Petrol)దిశగా అడుగులు వేయాలంటే వాహన తయారీ సంస్థలు తమ ఇంజిన్లను మరింత అనుకూలంగా మార్చాల్సి ఉంటుంది. ఇంధన వ్యవస్థలో ఉపయోగించే మెటీరియల్స్, ఇంధన ఇంజెక్షన్ వ్యవస్థ, ఇంజిన్ ట్యూనింగ్, సెన్సార్లు, సాఫ్ట్వేర్ కాలిబ్రేషన్ వంటి అంశాల్లో మార్పులు అవసరమయ్యే అవకాశం ఉంది. అందుకే ప్రభుత్వం కూడా ఇ25 అమలుకు ముందు అన్ని దశల్లో పరీక్షలు నిర్వహించాలని నిర్ణయించింది.
బ్రెజిల్ అనుభవమే భారత్కు ఆదర్శం.. Brazil Sets the Example
ప్రపంచంలో ఇథనాల్ (E25 Petrol)వినియోగంలో బ్రెజిల్ అగ్రగామిగా ఉంది. అక్కడ ప్రస్తుతం 30 నుంచి 32 శాతం వరకు ఇథనాల్ మిశ్రమాన్ని తప్పనిసరి చేశారు. అంతేకాదు, 100 శాతం ఇథనాల్తో నడిచే ఫ్లెక్స్-ఫ్యూయల్ వాహనాలు కూడా పెద్దఎత్తున వినియోగంలో ఉన్నాయి. చెరకు ఆధారంగా భారీగా ఇథనాల్ను ఉత్పత్తి చేస్తున్న బ్రెజిల్ నమూనానే భారత్ను కూడా ప్రేరేపిస్తోంది. దేశంలో చెరకు, మొక్కజొన్న ఆధారంగా ఉత్పత్తి అవుతున్న అదనపు ఇథనాల్ను వినియోగించడం ద్వారా ముడి చమురు దిగుమతులను తగ్గించడంతో పాటు రైతులకు అదనపు ఆదాయం కల్పించాలన్నది కేంద్ర ప్రభుత్వ ప్రధాన లక్ష్యం.
ప్రభుత్వం ఏమంటోంది? Government Stands Firm
ఇ20 (E20 Petrol) పూర్తిగా సురక్షితమైన ఇంధనమని కేంద్ర ప్రభుత్వం స్పష్టం చేస్తోంది. దేశంలో ప్రస్తుతం సుమారు 20 కోట్ల ద్విచక్ర వాహనాలు, 20 లక్షల నాలుగు చక్రాల వాహనాలు ఇ20 ఇంధనాన్ని వినియోగిస్తున్నాయని, ఇప్పటివరకు పెద్దఎత్తున ఎలాంటి సాంకేతిక సమస్యలు నమోదుకాలేదని ప్రభుత్వ వర్గాలు చెబుతున్నాయి. కేంద్ర రోడ్డు రవాణా మంత్రి నితిన్ గడ్కరీ కూడా ఇ20పై వస్తున్న విమర్శలను కొట్టిపారేశారు. ఇ20 వల్ల సమస్య ఎదురైన ఒక్క వాహనాన్నైనా చూపించాలని ఆయన సవాల్ విసిరారు. సామాజిక మాధ్యమాల్లో జరుగుతున్న ప్రచారాల్లో చాలా వరకు చెల్లింపు ప్రచారాలే కావచ్చని ఆయన అభిప్రాయపడ్డారు.
ఇ25 అమలు ఎప్పుడు? When Will E25 Be Introduced?
ప్రస్తుతం అందుబాటులో ఉన్న సమాచారం ప్రకారం ఇ25 (E25 Petrol) అమలు తక్షణమే జరిగే అవకాశం కనిపించడం లేదు. అన్ని రకాల పరీక్షలు విజయవంతంగా పూర్తయిన తర్వాతే ప్రభుత్వం తదుపరి నిర్ణయం తీసుకోనుంది. వాహన తయారీ సంస్థల అభిప్రాయాలు, వినియోగదారుల అనుభవాలు, ఇంజిన్ పనితీరు, మైలేజీ, కాలుష్య నియంత్రణ, నిర్వహణ వ్యయాలు వంటి అంశాలన్నింటినీ సమగ్రంగా విశ్లేషించిన తర్వాత మాత్రమే ఇ25 పెట్రోల్ను దేశవ్యాప్తంగా అందుబాటులోకి తీసుకురానున్నారు. ఏదేమైనా భారత్ ఇంధన స్వావలంబన దిశగా వేగంగా అడుగులు వేస్తోంది. పెట్రోలులో ఇథనాల్ మిశ్రమాన్ని పెంచడం వల్ల విదేశీ మారకద్రవ్య వ్యయం తగ్గడమే కాకుండా రైతులకు కొత్త మార్కెట్, దేశానికి ఇంధన భద్రత కూడా లభించే అవకాశం ఉంది. అయితే వినియోగదారుల విశ్వాసం కూడా అంతే ముఖ్యమైన అంశం. అందుకే ఇ20పై వస్తున్న అనుభవాలను పూర్తిగా విశ్లేషించి, వాహన తయారీ సంస్థలతో సంప్రదింపులు జరిపి, శాస్త్రీయ పరీక్షల్లో సత్ఫలితాలు వచ్చిన తర్వాతే ఇ25 (E25 Petrol)అమలు చేయాలని కేంద్రం భావిస్తోంది. మైలేజీలో స్వల్ప తగ్గుదల ఉండే అవకాశం ఉన్నప్పటికీ, ఇంజిన్ భద్రత, వాహన పనితీరు, దీర్ఘకాలిక విశ్వసనీయతపై పూర్తి స్పష్టత వచ్చిన తర్వాతే తదుపరి అడుగు పడనుంది. ఇంధన స్వావలంబన లక్ష్యాన్ని సాధిస్తూనే వినియోగదారుల ప్రయోజనాలను కాపాడటం ప్రభుత్వానికి ముందున్న అసలు సవాలుగా మారింది.
About the Author
