భారతీయ స్టాక్ మార్కెట్లలో మరోసారి ఐపీఓల హడావుడి మొదలైంది. గత రెండు నెలలుగా ప్రపంచ ఆర్థిక వాతావరణం కొంత అనిశ్చితంగా ఉన్నప్పటికీ.. దేశీయ పెట్టుబడిదారుల నమ్మకాన్ని చూస్తే మాత్రం స్టాక్ మార్కెట్లు ఉత్సాహంగా పరిగెడుతున్నాయి. ఈ నేపథ్యంలో డిసెంబర్–జనవరిలో వరుసగా రూ.40,000 కోట్లకు పైగా విలువైన కొత్త పబ్లిక్ ఇష్యూలు మార్కెట్లోకి రానున్నాయి. ఇప్పటికే డజనుకు పైగా కంపెనీలు సెబీ అనుమతులు పొందగా, మరికొన్ని చివరి దశలో ఉన్నాయి. మధ్య తరగతి, యువ పెట్టుబడిదారులు, సిస్టమాటిక్గా ఐపీఓలకు డబ్బులు కేటాయించే రిటైల్ గుంపులు పెరుగుతుండటంతో, కంపెనీలు కూడా మార్కెట్లోకి రావడానికి ఆసక్తి కనబరుస్తున్నాయి.
మళ్లీ పుంజుకున్న ఐపీఓ మార్కెట్ ..IPO Market Rebounds
2022–23లో గ్లోబల్ ద్రవ్యోల్బణం, వడ్డీరేట్ల పెంపులు, విదేశీ నిధుల ప్రవాహాల్లో హెచ్చుతగ్గులు వంటి అంశాల వల్ల ఐపీఓల సంఖ్య గణనీయంగా తగ్గింది. కానీ 2024 చివరి త్రైమాసికం నుంచి మార్కెట్ తిరిగి ఉత్సాహం చూపిస్తోంది. దీనికి ప్రధాన కారణాలు కంపెనీల బలమైన వృద్ధి అంచనాలు అని చెప్పొచ్చు. డొమెస్టిక్ ఇన్వెస్టర్ల ప్రాముఖ్యత పెరగడం, మ్యూచువల్ ఫండ్ల నుంచి భారీగా నిధుల ప్రవాహం, రికార్డు స్థాయిలో డీమ్యాట్ అకౌంట్ల తెరవడం, నిఫ్టీ, సెన్సెక్స్ గరిష్టాలు మరో కారణాలుగా చెప్పొచ్చు. ఏదేమైనా డిసెంబర్, జనవరిలో 15–18 ఐపీఓలు రావొచ్చని బ్రోకరేజ్ల అంచనా. వారిలో ఎక్కువగా ఉన్నవి మధ్యస్థ, పెద్దతరహా కంపెనీలేనని వారు చెబుతున్నారు.
ఏయే కంపెనీలు వస్తున్నాయంటే..? Which Companies Are Coming Up Next?
మార్కెట్లోకి రావడానికి సిద్ధమైన కంపెనీల రంగాలు చాలా విభిన్నంగా ఉన్నాయి. ఐటీ, మాన్యుఫాక్చరింగ్, ఫార్మా, ఇన్సూరెన్స్, ఇన్ఫ్రా, ఆటో కంపోనెంట్స్, కన్స్యూమర్ గూడ్స్, ఫిన్టెక్ వంటి కంపెనీలు ఐపీవోలకు సిద్ధమవుతున్నాయి. ఒక ప్రముఖ ఇన్సూరెన్స్ సంస్థ, దేశవ్యాప్తంగా కార్యకలాపాలు కలిగిన లాజిస్టిక్స్ కంపెనీ, పునరుత్పాదక శక్తి రంగంలో పనిచేస్తున్న గ్రీన్ ఎనర్జీ సంస్థలు రూ.5,000 కోట్ల సేకరణ లక్ష్యంగా ఐపీవోలు జారీ చేయనున్నాయి. అదేవిధంగా మూడు ఫార్మా తయారీ సంస్థలు, రెండు ఆటో కంపోనెంట్ తయారీ కంపెనీలు, ఒక పెద్ద ఐటీ సర్వీసెస్ సంస్థ, రెండు ఫిన్టెక్ స్టార్టప్లు మధ్య తరహాగా రూ.1,000–4,000 కోట్లకు ఐపీవోలకు సిద్ధమవుతున్నాయి. ఇక FMCG, హోమ్ ఎలెక్ట్రానిక్స్, నిర్మాణ సేవలు, హెల్త్కేర్ డయాగ్నస్టిక్స్ సంస్థలు రూ.300–800 కోట్లు మధ్య చిన్న ఐపీఓలు జారీకి సన్నద్ధమవుతున్నాయి. ఈ విస్తృత రంగాలు పెట్టుబడిదారులకు మంచి లాభాలను అందిస్తాయని విశ్లేషకులు పేర్కొంటున్నారు.
ఐపీఓలపై పెట్టుబడిదారులకు ఎందుకు ఆసక్తి పెరుగుతోంది? Why Are Investors Showing Growing Interest in IPOs?
► చాలా కంపెనీలు లిస్టింగ్ రోజునే 20%–80% వరకు లాభాలు ఇచ్చాయి. గత ఐపీఓల్లో బలమైన రిటర్న్స్ వల్ల కొత్త పెట్టుబడిదారులు పెద్ద సంఖ్యలో దూసుకొస్తున్నారు.
► మ్యూచువల్ ఫండ్ల మాదిరిగానే, నెలనెలా ఐపీఓల్లో కొంత భాగం పెట్టుబడి పెట్టే యువత సంఖ్య పెరిగింది. దీనికోసం ప్రత్యేకంగా షార్ట్–టర్మ్ SIPs ఏర్పాటు చేసుకుంటున్నారు.
► భారతీయ ఆర్థిక వ్యవస్థ 7% వృద్ధి దిశగా సాగుతుండటంతో, అనేక రంగాల్లో డిమాండ్ పెరిగింది. కంపెనీలు విస్తరణ కోసం మార్కెట్ నుంచి నిధులు సమీకరించాలనుకుంటున్నాయి.
► అమెరికా, యూరప్ వడ్డీరేట్ల తగ్గింపు సంకేతాలు ఇవ్వడంతో FIIలు మళ్ళీ భారత్ వైపు చూస్తున్నారు.
నిధుల వినియోగం ..Utilisation of Funds
ఐపీఓ ద్వారా సమీకరించబోయే నిధులు ఎక్కువగా ఈ మూడు ముఖ్య అవసరాల కోసం వినియోగించనున్నారు. మొదటగా అప్పుల చెల్లింపు. కంపెనీలు ఉన్నత వడ్డీరేట్లతో తీసుకున్న అప్పులను తగ్గించడానికి ఐపీఓ నిధులు ఉపయోగించుకుంటాయి. రెండోది క్యాపెక్స్ – నిర్మాణ విస్తరణ. కొత్త ప్లాంట్లు, యంత్రాలు, ప్రాజెక్టులు, ఉత్పత్తి సామర్థ్యం పెంపు నకు నిధులు వినియోగిస్తాయి. మూడోది సాంకేతిక అభివృద్ధి & కొత్త ఉత్పత్తులు. డిజిటల్ మౌలిక సదుపాయాల పెంపు, R&Dలో కంపెనీలు పెట్టుబడులు పెడతాయి.
ప్రస్తుతం మార్కెట్ పరిస్థితి ఐపీఓలకు ఎందుకు అనుకూలం? Why Are Current Market Conditions Favourable for IPOs?
మార్కెట్లో లిక్విడిటీ పెరిగింది. బ్యాంక్ డిపాజిట్ రేట్లు స్థిరంగా ఉండడంతో పెట్టుబడిదారులు ఆప్షన్లు వెతుకుతున్నారు. మ్యూచువల్ ఫండ్లలో రికార్డు స్థాయిలో SIP ఇన్ఫ్లోలు, సెన్సెక్స్, నిఫ్టీ సానుకూల మూడ్, దీర్ఘకాల వృద్ధి అవకాశాలు స్పష్టంగా కనిపిస్తున్నాయి. ఈ కారణాల వల్లనే కంపెనీలు ఐపీఓలను వేగంగా లాంచ్ చేసేందుకు సిద్ధమవుతున్నాయి.
రిటైల్ పెట్టుబడిదారులకు హెచ్చరికలు ..Warnings for Retail Investors
మార్కెట్ ఎంత బాగున్నా, పెట్టుబడిదారులు జాగ్రత్తలు తప్పనిసరిగా పాటించాల్సిందేనని బ్రోకరేజ్లు సూచిస్తున్నాయి. ప్రతిఒక్కురూ ప్రాథమిక అంశాలు తెలుసుకోవాలి. కంపెనీ బిజినెస్ మోడల్, లాభదాయకత, అప్పు, ఈక్విటీ నిష్పత్తి, భవిష్యత్ వ్యూహాలపై స్పష్టత ఉండాలి. ప్రీమియం ఎక్కువ అయితే జాగ్రత్త పడాలి. ఇకో వ్యవస్థలోని కొన్ని కంపెనీలు ఆచరణాత్మకంగా లేమి ఉన్నప్పటికీ హై వాల్యూయేషన్ కోరుతున్నాయి. గ్రే మార్కెట్ ప్రీమియం (GMP)పై మాత్రమే ఆధారపడవద్దు. ఇది పూర్తిగా ప్రతిబింబించదు. మార్పులు వేగంగా చోటు చేసుకుంటాయి. లాంగ్–టర్మ్ దృష్టి ముఖ్యం. ఐపీఓలు లిస్టింగ్ గైన్స్ కోసం మాత్రమే కాకుండా, దీర్ఘకాలంలో సంస్థలు విలువనిస్తాయా అనేది తెలుసుకోవాలి.
డిజిటల్ ఖాతాదారుల పెరుగుదల ..Rise in Digital Customers
ప్రస్తుతం దేశవ్యాప్తంగా 14 కోట్లకు పైగా డీమ్యాట్ అకౌంట్లు ఉన్నట్లు మార్కెట్ డేటా చూపిస్తోంది. ఇది రెండు సంవత్సరాల క్రితంతో పోలిస్తే రెండింతలు. ఆర్థిక విజ్ఞానం పెరగడంతో, గ్రామీణ ప్రాంతాలు కూడా ఈ తరంగంలో చేరుతున్నాయి. ఏ యే ఐపీఓ ఎప్పుడు వస్తుందో మొబైల్ యాప్లలో వెంటనే నోటిఫికేషన్లు రావడంతో పెట్టుబడిదారుల స్పందన వేగవంతమైంది. బ్రోకరేజ్ హౌసెస్ అంచనా ప్రకారం.. డిసెంబర్ & జనవరిలో 15–18 ఐపీఓలు మార్కెట్లోకి రానున్నాయి. వీటిలో 5 పెద్ద ఇష్యూలు ఉన్నాయి. SME మార్కెట్లో కూడా భారీ స్పందన కొనసాగుతుంది. “మార్కెట్ ప్రస్తుతం అత్యంత అనుకూల దశలో ఉంది. ఎఫ్ఐఐలు, డొమెస్టిక్ ఇన్వెస్టర్లు ఇద్దరూ బలంగా మద్దతు ఇస్తున్నారు. అందువల్ల కంపెనీలు కూడా ఈ సందర్భాన్ని వినియోగించుకుంటున్నాయి,” అని నిపుణులు చెబుతున్నారు.
2026 ఆరంభానికి ముందే మరో భారీ క్యూ? Another Big Queue Before Early 2026?
డిసెంబర్–జనవరి తరువాత కూడా సరాసరి ఐపీఓల వరద కొనసాగవచ్చని విశ్లేషకులు పేర్కొంటున్నారు. ప్రత్యేకంగా టెక్ స్టార్టప్స్, ఈ–కామర్స్, ఫుడ్ డెలివరీ, ఎలక్ట్రిక్ వాహన తయారీ కంపెనీలు.. 2026 మధ్యకాలానికి భారీగా క్యూ పడే అవకాశం ఉందని భావిస్తున్నారు.
ఐపీఓ అంటే లాభం కాదు.. IPO Doesn’t Guarantee Profit
ఐపీఓ అంటేనే లాభం అనే అంచనా సరైంది కాదు. కొన్ని ఇష్యూలు లిస్టింగ్ రోజే డిస్కౌంట్లో తెరచి పెట్టుబడిదారులను నిరాశపరిచే అవకాశం ఉంటుంది. అందువల్ల ప్రాస్పెక్టస్ చదవాలి. నిపుణుల రీసెర్చ్ రిపోర్టులు చూడాలి. సంస్థ ఫౌండర్ల విశ్వసనీయతను అంచనా వేయాలి. లాభం–నష్టం అవకాశాల్ని సమీక్షించాలి. అన్నింటికంటే ముఖ్యంగా పెట్టుబడి పెట్టే మొత్తం మీ రిస్క్ ప్రొఫైల్కు అనుగుణంగా ఉండాలి.
రూ.1.6 లక్షల కోట్ల సమీకరణ…1.6 Lakh Crore Fund Mobilisation
2025 జనవరి నుంచి ఇప్పటి వరకు 96 కంపెనీలు స్టాక్ మార్కెట్లో రంగప్రవేశం చేశాయి. వీటన్నింటి ద్వారా మొత్తం రూ.1.60 లక్షల కోట్లు సమీకరించబడ్డాయి. డిసెంబరులో షెడ్యూల్ అయిన కొత్త ఐపీఓలు కూడా చేరితే 2025 క్యాలెండర్ సంవత్సరానికి మొత్తం పబ్లిక్ ఇష్యూ సమీకరణ రూ.2 లక్షల కోట్లు దాటవచ్చని మార్కెట్ విశ్లేషకులు అంటున్నారు. గత మూడు నెలల్లోనే 40కు పైగా ఐపీఓలు రావడం గమనార్హం. 2024లో మొత్తం 91 కంపెనీలు రూ.1.6 లక్షల కోట్లు సమీకరించిన విషయం తెలిసిందే. డిసెంబరు ద్వితీయార్ధంలో ఆర్థిక రంగం దృష్టిని ఆకర్షించేలా ఐసీఐసీఐ ప్రుడెన్షియల్ ఏఎంసీ భారీ ఐపీఓకు రంగం సిద్ధం చేసింది. దీని సమీకరణ లక్ష్యం రూ.10,000 కోట్లు పూర్తిగా ఆఫర్ ఫర్ సేల్ (OFS)లో అమ్మకానికి వచ్చేవి 1.76 కోట్ల షేర్లు. దేశంలో అతి పెద్ద ఆస్తి నిర్వహణ సంస్థలలో ఒకటైన ఈ ఏఎంసీ ఐపీఓపై సంస్థాగత పెట్టుబడిదారులు భారీ ఆసక్తి చూపుతున్నట్లు సమాచారం. సాఫ్ట్బ్యాంక్, ఫేస్బుక్ వంటి గ్లోబల్ ఇన్వెస్టర్ల మద్దతుతో ఎదిగిన మీషో ఐపీఓ ఈ డిసెంబరు 3 నుంచి అందుబాటులోకి రానుంది. డిసెంబరులో క్లీన్ మ్యాక్స్ ఎన్విరో ఎనర్జీ (రూ.5,200 కోట్లు), ఫ్రాక్టల్ అనలిటిక్స్ ( రూ.4,900 కోట్లు), జునిపెర్ గ్రీన్ ఎనర్జీ ( రూ.3,000 కోట్లు) ఐఈవోలు జారీ చేయనున్నాయి.
రాబోయే రెండు నెలల్లో మరికొన్ని కీలక ఇష్యూలు.. More Key IPOs Lined Up for the Next Two Months
డిసెంబరు–జనవరిలో ఐపీఓలకు వచ్చే కంపెనీల జాబితా విస్తృతంగా ఉంది. వాటిలో ముఖ్యమైనవి ఇవి..
మణిపాల్ పేమెంట్ సర్వీసెస్ , కనోడియా సిమెంట్ , కరోనా రెమిడీస్ , మిల్కీ మిస్ట్ డైరీ, అమాగి మీడియా ల్యాబ్స్ , నెఫ్రోకేర్ హెల్త్ సర్వీసెస్, వీడా క్లినికల్ రీసెర్చ్ , ఎల్సీసీ ప్రాజెక్ట్స్ , వాటర్వేస్ లీజర్, కేఎస్హెచ్ ఇంటర్నేషనల్ , స్కైవేస్ ఎయిర్ సర్వీసెస్ , అర్డీ ఇంజినీరింగ్ , పీఎన్జీఎస్ రెవా డైమండ్ , సీఐఈఎల్ హెచ్ సర్వీసెస్ ..
వంటివి ఐపీవోలకు వచ్చే కంపెనీల జాబితాలో ఉన్నాయి.
ఈ ఏడాది వచ్చిన భారీ ఐపీఓలు..Major IPOs Launched This Year
2025లో ఇప్పటివరకు వచ్చిన భారీ పబ్లిక్ ఇష్యూలలో ఈ పేర్లు ప్రత్యేకంగా నిలిచాయి .. ప్రధానంగా టాటా క్యాపిటల్ – రూ.15,512 కోట్లు , ఎల్జీ ఎలక్ట్రానిక్స్ – రూ.11,607 కోట్లు , లెన్స్కార్ట్ – రూ.7,278 కోట్లు , గ్రో ఫిన్టెక్ – రూ.6,632 కోట్లు .. ఈ ఇష్యూలు లిస్టింగ్ రోజునే భారీ ప్రీమియంతో తెరచి, పెట్టుబడిదారులకు మంచి లాభాలు అందించాయి.
About the Author
