మనిషి జీవితంలో ఎంతో కష్టపడి సంపాదించిన ఆస్తి… చివరికి ఎవరి చేతికి చేరాలన్నది చాలా కీలకమైన నిర్ణయం. ఆస్తిని తనకు ఇష్టమైన వ్యక్తికి బదిలీ చేయాలనుకున్నప్పుడు చాలా మందిలో కలిగే సందేహం ఒక్కటే…“జీవించి ఉండగానే గిఫ్ట్ డీడ్ (Gift Deed ) చేయడం మంచిదా? లేక మరణం తర్వాత అమలయ్యే వీలునామా (Will) రాయడమే ఉత్తమమా?” ఈ రెండింటి మధ్య తేడాలు, ప్రయోజనాలు, ప్రమాదాలు, చట్టపరమైన అంశాలు, పన్నుల ప్రభావం, కుటుంబ పరిస్థితుల ప్రకారం ఏది సరిపోతుందన్న విషయాలను ఇప్పుడు విపులంగా తెలుసుకుందాం.
ఆస్తి బదిలీకి ఉన్న మార్గాలు.. Ways for Property Transfer
భారతదేశంలో ఆస్తి బదిలీ ప్రధానంగా మూడు విధాలుగా జరుగుతుంది. గిఫ్ట్ డీడ్ (బహుమతి ద్వారా), వీలునామా (Will)
వారసత్వ చట్టాల ద్వారా (Succession) .. ఈ మూడు విధానాల్లో గిఫ్ట్ డీడ్, వీలునామాల మధ్యే ఎక్కువ చర్చ జరుగుతుంది.
గిఫ్ట్ డీడ్ అంటే ఏమిటి? What Is a Gift Deed?
భారతీయ కాంట్రాక్ట్ చట్టం, ఆస్తి బదిలీ చట్టం (Transfer of Property Act) ప్రకారం… ఒక వ్యక్తి తన సొంతంగా సంపాదించిన స్థిర లేదా చర ఆస్తిని ఎలాంటి ప్రతిఫలం లేకుండా మరో వ్యక్తికి బదిలీ చేయడాన్ని గిఫ్ట్గా పరిగణిస్తారు. ఈ బదిలీని చట్టబద్ధంగా అమలు చేయడానికి గిఫ్ట్ డీడ్ అనే పత్రం అవసరం.
గిఫ్ట్ డీడ్ ఎలా అమలవుతుంది? How Is a Gift Deed Executed?
గిఫ్ట్ డీడ్(Gift Deed ) ను స్టాంప్ పేపర్పై తయారు చేయాలి. సంబంధిత సబ్రిజిస్ట్రార్ కార్యాలయంలో తప్పనిసరిగా నమోదు చేయాలి. నమోదు అయిన రోజే ఆస్తి హక్కులు పూర్తిగా గ్రహీతకు బదిలీ అవుతాయి. అంటే… గిఫ్ట్ డీడ్ అమలైన క్షణం నుంచే ఆస్తిపై మీకు హక్కు ఉండదు.
గిఫ్ట్ డీడ్లో ముఖ్యమైన అంశాలు.. Key Aspects of a Gift Deed
– 18 ఏళ్లు నిండిన వ్యక్తి ఎవరైనా గిఫ్ట్ డీడ్(Gift Deed ) ఇవ్వవచ్చు. అయితే వారి మానసిక స్థితి సక్రమంగా ఉండాలి. ఆస్తిపై పూర్తి హక్కు కలిగి ఉండాలి. గిఫ్ట్ డీడ్ ఇచ్చే వ్యక్తి దివాలా తీసిన వ్యక్తి కాకూడదు. మైనరై ఉండకూడదు. గిఫ్ట్ డీడ్ ద్వారా ఆస్తి బదిలీ తక్షణమే పూర్తవుతుంది. కుటుంబ సభ్యులకు ముందే ఆస్తి పంచి ఇవ్వవచ్చు. భవిష్యత్తులో వారసత్వ గొడవలు తగ్గుతాయి. కొన్ని రాష్ట్రాల్లో దగ్గరి బంధువులకు స్టాంప్ డ్యూటీ రాయితీ ఉంటుంది. గిఫ్ట్ ఇచ్చిన తర్వాత ఆస్తిపై మీకు ఎలాంటి హక్కు ఉండదు. జీవితాంతం అవసరాలకు ఆధారపడాల్సిన పరిస్థితి రావచ్చు. గిఫ్ట్ డీడ్ను ఒకసారి నమోదు చేస్తే…తిరిగి రద్దు చేయడం చాలా కష్టం. గిఫ్ట్ డీడ్పై ఆదాయపు పన్ను చట్టం – సెక్షన్ 56(2) అమలవుతుంది. రూ.50,000కు మించిన గిఫ్ట్ ను బంధువు కాని వ్యక్తికి ఇచ్చినట్లయితే గ్రహీతకు అది పన్ను పరిధిలోకి వచ్చే ఆదాయం అవుతుంది. తల్లిదండ్రులు, భార్య/భర్త, పిల్లలు, సోదరులు, అక్కచెల్లెళ్లు కు ఇచ్చిన గిఫ్ట్లపై ఆదాయపన్ను మినహాయింపు ఉంటుంది.
వీలునామా అంటే ఏమిటి? What Is a Will?
వీలునామా (Will) అనేది… ఒక వ్యక్తి తన మరణం తర్వాత తన ఆస్తులు ఎవరికీ, ఎలా బదిలీ కావాలన్నదాన్ని స్పష్టంగా పేర్కొంటూ రాసే చట్టపరమైన పత్రం. వీలునామా అనేది మరణం తర్వాత మాత్రమే అమల్లోకి వస్తుంది. జీవించి ఉన్నంతకాలం ఆస్తిపై పూర్తి నియంత్రణ మీకే ఉంటుంది. దీనికి స్టాంప్ డ్యూటీ అవసరం లేదు. నమోదు తప్పనిసరి కాదు. మన దేశంలో వీలునామా రాయకపోవడం వల్లే…కుటుంబ గొడవలు, కోర్టు కేసులు, ఆస్తి వివాదాలు ఎక్కువగా జరుగుతున్నాయి. అదే వీలునామా రాయడం వల్ల మీరు జీవించి ఉన్నంతకాలం ఆస్తిని ఉపయోగించుకోవచ్చు. స్టాంప్ డ్యూటీ, రిజిస్ట్రేషన్ ఫీజులు అవసరం లేదు. ఎప్పుడైనా వీలునామాను మార్చుకోవచ్చు లేదా రద్దు చేయవచ్చు. వీలునామా ద్వారా వచ్చిన ఆస్తిపై ఎస్టేట్ డ్యూటీ లేదు. వీలునామా నమోదు అనేది చట్టపరంగా తప్పనిసరి కాదు. కానీ నమోదైన వీలునామా కోర్టులో బలమైన ఆధారం. నకిలీ ఆరోపణలకు అవకాశం తక్కువ. కుటుంబ సభ్యుల మధ్య వివాదాలు తగ్గుతాయి. కాబట్టి నిపుణులు నమోదైన వీలునామానే మెరుగైనదని నిపుణులు చెబుతున్నారు. వీలునామా లేకుండా మరణిస్తే… ఆస్తి వారసత్వ చట్టాల ప్రకారం బదిలీ అవుతుంది. వృద్ధాప్యంలో భద్రత కావాలంటే.. ఆస్తిపై నియంత్రణ కొనసాగాలంటే.. కుటుంబ శాంతి కావాలంటే వీలునామా రాయడం ఎంతో అవసరం. అత్యవసర సహాయం చేయాలనుకున్నప్పుడు. చిన్న ఆస్తి మాత్రమే బదిలీ చేయాలనుకున్నప్పుడు గిఫ్ట్డీడ్ అవసరం.
భవిష్యత్తు భద్రత ముఖ్యం .. Future Security Is Important
భావోద్వేగాలకన్నా భవిష్యత్తు భద్రత ముఖ్యం. పన్నుల కోసం మాత్రమే ఆస్తి బదిలీ చేయొద్దు న్యాయ నిపుణుల సలహాతోనే నిర్ణయం తీసుకోవాలని నిపుణులు చెబుతున్నారు. ఆస్తి అనేది కేవలం డబ్బు కాదు…అది మీ జీవితానికి అద్దం. ఒక్క తప్పు నిర్ణయం మీ జీవితాంతం సమస్యలకు కారణం కావచ్చు. కాబట్టి…ఆస్తి బదిలీ విషయంలో తొందరపడకండి. సరైన మార్గం ఎంచుకోండి. మీ భవిష్యత్తును మీరు భద్రపరచుకోండి.
గిఫ్ట్ డీడ్ – రద్దు చేయగలమా? Can a Gift Deed Be Cancelled?
సాధారణంగా గిఫ్ట్ డీడ్ను రద్దు చేయడం చాలా కష్టం. ఎందుకంటే, గిఫ్ట్ ఇచ్చిన వెంటనే ఆస్తి హక్కులు గ్రహీతకు వెళ్ళిపోతాయి. గ్రహీత ఇప్పటికే ఆస్తిని ఉపయోగించడం, నిర్వహించడం మొదలుపెడితే, రద్దు కఠినతరం. గ్రహీత మోసం లేదా వశంలో పెట్టి గిఫ్ట్ తీసుకున్నట్లయితే.. గిఫ్టర్ అనారోగ్యం, మానసిక స్థితి లోపం కారణంగా గిఫ్ట్ ఇచ్చినట్లయితే.. ఈ సందర్భాల్లో మాత్రమే చట్టపరంగా గిఫ్ట్ డీడ్ రద్దు కావచ్చు. అంటే, సాధారణ పరిస్థితుల్లో గిఫ్ట్ డీడ్ రద్దు సాధ్యం కాదు.
వీలునామా – రద్దు చేయగలమా? Can a Will Be Cancelled?
వీలునామా అనేది మరణం తర్వాత ఆస్తిని ఎవరికీ, ఎలా బదిలీ చేయాలనేది రాసే చట్టపరమైన పత్రం. వీలునామా రద్దు సాధ్యమే. వీలునామాను ఎప్పుడైనా రద్దు చేయవచ్చు. రద్దు లేదా మార్పులు వీలునామా రాసిన వ్యక్తి జీవితంలోనే మాత్రమే చేయవచ్చు. వ్యక్తి ఆస్తి బదిలీ విధానాన్ని, లబ్ధిదారులను, వాటిని సవరించుకోవచ్చు. కొత్త లబ్ధిదారులను చేర్చవచ్చు. గత వీలునామాను రద్దు చేసి, కొత్త దానిని నమోదు చేయవచ్చు. వీలునామా రద్దు చేయడం లేదా మార్చడం చాలా సులభం, మరియు చట్టపరంగా పరిమితులు తక్కువ.
