కరోనా కాలంలో ఉద్యోగాలు కోల్పోయి, ఆదాయం ఆగిపోయి, కనీస అవసరాలు తీర్చుకోవడానికి కూడా ఇబ్బందులు పడిన వారిని చూశాం. చేతిలో పొదుపు లేకపోవడంతో కొందరు అప్పుల కోసం ఇతరులపై ఆధారపడాల్సి వచ్చింది. మరికొందరు తమ పెట్టుబడులను మధ్యలోనే వెనక్కి తీసుకోవాల్సిన పరిస్థితి ఎదుర్కొన్నారు. ఈ అనుభవాలు మనకు ఒక విషయాన్ని స్పష్టంగా తెలియజేశాయి. సంపాదన ఎంత ఉన్నా, ఆర్థికంగా ఎంత స్థిరంగా ఉన్నా.. అనుకోని పరిస్థితులను ఎదుర్కోవడానికి కొంత డబ్బు చేతిలో (Emergency Fund) ఉండాలి. ఆర్థిక ప్రణాళికలో ఈ అవసరాన్ని తీర్చేదే అత్యవసర నిధి. ఇది కేవలం పొదుపు కాదు.. కష్టకాలంలో కుటుంబానికి అండగా నిలిచే ఆర్థిక భరోసా.
ఎప్పుడు అవసరం వస్తుందో తెలియదు! Why Is an Emergency Fund Important?
జీవితంలో ఎలాంటి పరిస్థితులు ఎదురవుతాయో ముందుగానే చెప్పలేం. ఆరోగ్య సమస్యలు రావచ్చు. ఉద్యోగం పోవచ్చు. వ్యాపారంలో నష్టాలు ఎదురుకావచ్చు. ఇంట్లో ఫ్రిజ్‌, వాషింగ్‌ మెషీన్‌ వంటి ముఖ్యమైన వస్తువులు అకస్మాత్తుగా పాడైపోవచ్చు. కుటుంబంలో ఎవరికైనా అనారోగ్యం వస్తే అత్యవసరంగా మరో ప్రాంతానికి వెళ్లాల్సి రావచ్చు. ఇలాంటి సందర్భాల్లో వెంటనే డబ్బు(Emergency Fund) అవసరమవుతుంది. అప్పటివరకు వచ్చిన జీతంతోనే ఖర్చులు సర్దుబాటు చేసుకుంటున్నవారికి ఈ పరిస్థితులు మరింత భారంగా మారతాయి. అత్యవసర పరిస్థితి వచ్చిన తర్వాత డబ్బు కోసం వెతకడం కంటే.. అలాంటి పరిస్థితి ఎదురైనప్పుడు ఉపయోగపడేలా ముందుగానే సిద్ధంగా ఉండటం మంచిది. అత్యవసర నిధి ఉంటే రోజువారీ ఖర్చులకు, ఇంటి అవసరాలకు, వైద్య ఖర్చులకు తగిన మొత్తాన్ని అందుబాటులో ఉంచుకోవచ్చు. ముఖ్యంగా ఆదాయం కొంతకాలం ఆగిపోయినా కుటుంబ అవసరాలను వెంటనే తగ్గించుకోవాల్సిన ఒత్తిడి ఉండదు. కొత్త ఉద్యోగం వెతుక్కోవడానికి, వ్యాపారాన్ని తిరిగి నిలబెట్టుకోవడానికి కొంత సమయం లభిస్తుంది.
అప్పుల కోసం వెతకాల్సిన అవసరం ఉండదు! Avoid Borrowing During Emergencies
అత్యవసరంగా డబ్బు(Emergency Fund) అవసరమైనప్పుడు చాలామంది మొదట స్నేహితులు, బంధువులను సంప్రదిస్తారు. మరికొందరు క్రెడిట్‌ కార్డులను ఉపయోగిస్తారు. ఇంకొందరు వ్యక్తిగత రుణాలు తీసుకుంటారు. అయితే ఈ మార్గాలన్నీ ప్రతి సందర్భంలోనూ అనుకూలంగా ఉండవు. స్నేహితులు, బంధువుల నుంచి డబ్బు తీసుకుంటే తిరిగి చెల్లించే విషయంలో ఇబ్బందులు రావచ్చు. సంబంధాలపైనా ప్రభావం పడే అవకాశం ఉంటుంది. క్రెడిట్‌ కార్డుల బకాయిలను గడువులోగా చెల్లించకపోతే అధిక వడ్డీ భారం పెరుగుతుంది. వ్యక్తిగత రుణాలు తీసుకుంటే నెలవారీ ఈఎంఐల రూపంలో మరో బాధ్యత మొదలవుతుంది. ఇప్పటికే గృహ రుణం, వాహన రుణం వంటి బాధ్యతలు ఉన్నవారికి కొత్త రుణం మరింత భారంగా మారవచ్చు. ఈ పరిస్థితుల్లో అత్యవసర నిధి ఉపయోగపడుతుంది. అవసరమైన డబ్బును మన పొదుపు నుంచే తీసుకోవచ్చు. ఆపద సమయంలో అప్పుల కోసం ఇతరులపై ఆధారపడాల్సిన అవసరం తగ్గుతుంది. అయితే అత్యవసర నిధిని అనవసర కొనుగోళ్లకు, విహారయాత్రలకు లేదా సాధారణ నెలవారీ ఖర్చుల కోసం ఉపయోగించకూడదు. నిజంగా అత్యవసరమైన సందర్భాలకే పరిమితం చేయాలి.
కనీసం ఆరు నెలల ఖర్చులైనా ఉండాలి! How Much Emergency Fund Do You Need?
అత్యవసర నిధి(Emergency Fund) ఎంత ఉండాలనే విషయంలో ప్రతి కుటుంబం తన పరిస్థితులను బట్టి నిర్ణయం తీసుకోవాలి. సాధారణంగా కనీసం మూడు నుంచి ఆరు నెలల అవసరమైన ఖర్చులకు సరిపడా మొత్తాన్ని లక్ష్యంగా పెట్టుకోవచ్చు. ఉద్యోగ భద్రత తక్కువగా ఉన్నవారు, వ్యాపారం చేసేవారు, కుటుంబంలో ఒక్కరి సంపాదనపైనే ఆధారపడేవారు ఆరు నుంచి పన్నెండు నెలల ఖర్చులకు సరిపడా నిధిని ఏర్పాటు చేసుకోవడం మంచిది. ఈ మొత్తాన్ని లెక్కించేటప్పుడు కేవలం ఇంటి అద్దె, నిత్యావసర సరుకుల ఖర్చులనే పరిగణనలోకి తీసుకోవడం సరిపోదు. విద్యుత్‌ బిల్లులు, పిల్లల చదువు, మందులు, వైద్య ఖర్చులు, బీమా ప్రీమియాలు, ప్రయాణ ఖర్చులు వంటి తప్పనిసరి అవసరాలనూ పరిగణనలోకి తీసుకోవాలి. గృహ రుణం, వాహన రుణం, వ్యక్తిగత రుణం వంటి వాటి ఈఎంఐలను కూడా లెక్కలో చేర్చాలి. ఉదాహరణకు, ఒక కుటుంబానికి నెలకు రూ.30,000 తప్పనిసరి ఖర్చులు ఉన్నాయనుకుందాం. అద్దె, ఆహారం, విద్యుత్‌ బిల్లులు, పిల్లల అవసరాలు, వైద్య ఖర్చులు, రుణాల ఈఎంఐలు అన్నీ కలిపి ఈ మొత్తం అవుతుందని భావిస్తే.. ఆరు నెలలకు రూ.1.80 లక్షలు అవసరమవుతాయి. అంటే ఈ కుటుంబం అత్యవసర నిధిగా కనీసం రూ.1.80 లక్షలు సమకూర్చుకోవడాన్ని లక్ష్యంగా పెట్టుకోవచ్చు. అయితే కుటుంబ సభ్యుల సంఖ్య, ఉద్యోగ భద్రత, ఆరోగ్య పరిస్థితులు, ఇతర ఆర్థిక బాధ్యతలను బట్టి ఈ మొత్తాన్ని పెంచుకోవాల్సి రావచ్చు.
పెట్టుబడులను మధ్యలోనే వెనక్కి తీసుకోవద్దు! Protect Your Investments and Financial Goals
అత్యవసర పరిస్థితుల్లో డబ్బు (Emergency Fund)అవసరమైతే చాలామంది తమ పెట్టుబడులను వెనక్కి తీసుకోవాలని ఆలోచిస్తారు. ముఖ్యంగా షేర్లు, ఈక్విటీ మ్యూచువల్‌ ఫండ్లలో పెట్టుబడులు పెట్టినవారు మార్కెట్ పరిస్థితులను పట్టించుకోకుండా వాటిని విక్రయించాల్సి రావచ్చు. అయితే ఆ సమయంలో మార్కెట్ పడిపోయి ఉంటే నష్టాలతోనే పెట్టుబడులను వెనక్కి తీసుకోవాల్సిన పరిస్థితి ఏర్పడుతుంది. దీనివల్ల దీర్ఘకాలిక ఆర్థిక లక్ష్యాలు దెబ్బతినవచ్చు. ఇంటి కొనుగోలు, పిల్లల ఉన్నత విద్య, పదవీ విరమణ వంటి లక్ష్యాల కోసం పెట్టిన పెట్టుబడులను అనుకోని ఖర్చుల కోసం ఉపయోగించాల్సి వస్తే భవిష్యత్తు ప్రణాళికలు ప్రభావితమవుతాయి. అందుకే పెట్టుబడులకు, అత్యవసర నిధికి మధ్య స్పష్టమైన విభజన ఉండాలి. అత్యవసర నిధిని ఏర్పాటు చేసుకోవడం వల్ల పెట్టుబడులను అనవసరంగా విక్రయించకుండా ఉండే అవకాశం పెరుగుతుంది. సిప్‌ ద్వారా మ్యూచువల్‌ ఫండ్లలో పెట్టుబడులు పెట్టేవారు కూడా ఆదాయం ఆగిపోయినప్పుడు తమ పరిస్థితిని సమీక్షించుకోవాలి. అత్యవసర నిధి ఉంటే కొంతకాలం పెట్టుబడులను కొనసాగించడానికి అవకాశం ఉంటుంది. అయితే ఆదాయం పూర్తిగా నిలిచిపోయి, కుటుంబ అవసరాలు తీర్చడం కష్టమైతే పెట్టుబడులను తాత్కాలికంగా తగ్గించడం లేదా నిలిపివేయడం గురించి ఆలోచించవచ్చు. అత్యవసర పరిస్థితిలో కుటుంబ అవసరాలకే మొదటి ప్రాధాన్యం ఇవ్వాలి.
ఒకేసారి కాకుండా క్రమంగా పోగు చేయాలి! How to Build an Emergency Fund
అత్యవసర నిధి (Emergency Fund)ఏర్పాటు చేసుకోవాలంటే ఒకేసారి పెద్ద మొత్తంలో డబ్బు ఉండాల్సిన అవసరం లేదు. చిన్న మొత్తాలతో ప్రారంభించి క్రమంగా లక్ష్యాన్ని చేరుకోవచ్చు. ముందుగా నెలవారీ ఆదాయం, తప్పనిసరి ఖర్చులను పరిశీలించాలి. వాటిలో ఎంత మొత్తాన్ని పొదుపు చేయగలమో నిర్ణయించుకోవాలి. జీతం వచ్చిన వెంటనే కొంత మొత్తాన్ని అత్యవసర నిధి కోసం ప్రత్యేకంగా పక్కన పెట్టుకోవడం మంచి అలవాటు. మిగిలిన డబ్బుతోనే ఇతర ఖర్చులను సర్దుబాటు చేసుకోవాలి. ఉదాహరణకు, నెలకు రూ.5,000 చొప్పున పొదుపు చేస్తే ఏడాదికి రూ.60,000 సమకూరుతుంది. నెలకు రూ.10,000 పొదుపు చేయగలిగితే ఏడాదికి రూ.1.20 లక్షలు జమ అవుతాయి. ఇలా క్రమంగా పొదుపు చేస్తూ లక్ష్యాన్ని చేరుకోవచ్చు. ఒకేసారి పెద్ద మొత్తాన్ని కూడబెట్టలేకపోతున్నామని నిరుత్సాహపడాల్సిన అవసరం లేదు. పొదుపు అలవాటును ప్రారంభించడం ముఖ్యం. ఏడాది చివరలో వచ్చే బోనస్‌, ప్రోత్సాహకాలు, ఇతర అదనపు ఆదాయంలో కొంత భాగాన్ని కూడా ఈ నిధికి కేటాయించవచ్చు. అయితే అత్యవసర నిధి కోసం పొదుపు చేస్తూనే ఇంటి ఖర్చులు, రుణ చెల్లింపులు, బీమా వంటి ముఖ్యమైన బాధ్యతలను నిర్లక్ష్యం చేయకూడదు. ఆదాయం పెరిగినప్పుడు ఖర్చులను కూడా అదే స్థాయిలో పెంచకుండా పొదుపును పెంచుకోవడం వల్ల లక్ష్యాన్ని త్వరగా చేరుకోవచ్చు.
డబ్బు అందుబాటులో ఉండటం ముఖ్యం! Keep Your Emergency Fund Easily Accessible
అత్యవసర నిధిని(Emergency Fund) ఏర్పాటు చేయడమే కాదు.. అవసరమైనప్పుడు వెంటనే ఉపయోగించుకునేలా ఉంచుకోవడం కూడా ముఖ్యం. ఈ డబ్బును మొత్తం షేర్లలో లేదా ఎక్కువకాలం డబ్బు తీసుకోలేని పెట్టుబడుల్లో ఉంచడం సరైన పద్ధతి కాదు. అత్యవసర సమయంలో మార్కెట్ పరిస్థితులు అనుకూలంగా లేకపోతే నష్టాలు రావచ్చు. అలాగే కొన్ని పెట్టుబడుల నుంచి డబ్బును వెనక్కి తీసుకోవడానికి సమయం పట్టవచ్చు. అందుకే అత్యవసర నిధిలో ప్రధాన భాగాన్ని పొదుపు ఖాతా లేదా తక్షణమే నగదుగా మార్చుకోగలిగే సురక్షితమైన మార్గాల్లో ఉంచుకోవచ్చు. కొంత మొత్తాన్ని అవసరమైనప్పుడు సులభంగా తీసుకునే సౌకర్యం ఉన్న స్వల్పకాలిక సాధనాల్లో ఉంచాలనుకుంటే వాటి నిబంధనలు, ఉపసంహరణ పరిమితులు, ఛార్జీలను ముందుగానే తెలుసుకోవాలి. ఎక్కువ వడ్డీ సంపాదించాలనే ఉద్దేశంతో ఈ నిధిని ప్రమాదకరమైన పెట్టుబడుల్లో పెట్టకూడదు. ఇక్కడ ప్రధాన లక్ష్యం అధిక రాబడి కాదు.. అవసరమైనప్పుడు డబ్బు అందుబాటులో ఉండటం.
కుటుంబ సభ్యులకూ వివరాలు తెలియాలి! Ensure Family Awareness
అత్యవసర నిధి (Emergency Fund)ఎక్కడ ఉంది? దాన్ని ఎలా ఉపయోగించాలి? ఏ బ్యాంకు ఖాతాలో డబ్బు ఉంది? వంటి వివరాలు కుటుంబ సభ్యులకు తెలియాలి. కుటుంబంలో సంపాదించే వ్యక్తికి మాత్రమే ఈ వివరాలు తెలిస్తే, ఆయన లేదా ఆమె అందుబాటులో లేని సమయంలో ఇతరులు ఇబ్బందులు పడవచ్చు. అందుకే జీవిత భాగస్వామికి, అవసరాన్ని బట్టి కుటుంబంలోని ఇతర బాధ్యతగల సభ్యులకు ఈ నిధి గురించి వివరించాలి. అయితే బ్యాంకు పాస్‌వర్డ్‌లు, ఓటీపీలు, ఏటీఎం పిన్‌లు వంటి రహస్య సమాచారాన్ని నిర్లక్ష్యంగా పంచుకోకూడదు. డబ్బును ఎలా పొందాలి, అవసరమైనప్పుడు ఎవరిని సంప్రదించాలి వంటి వివరాలను సురక్షితంగా తెలియజేయాలి. కుటుంబ ఆర్థిక ప్రణాళికలో అత్యవసర నిధికి ప్రత్యేక స్థానం కల్పించాలి. ఖర్చులు పెరిగినప్పుడు, ఆదాయం మారినప్పుడు ఈ నిధిని సమీక్షించుకుంటూ అవసరమైన మేరకు పెంచుకోవాలి.
ఆర్థిక భద్రతకు తొలి అడుగు! Emergency Fund: The First Step Towards Financial Security
అత్యవసర నిధి (Emergency Fund)వల్ల అనుకోని సమస్యలు పూర్తిగా తొలగిపోవు. కానీ వాటిని ఎదుర్కొనే సామర్థ్యం పెరుగుతుంది. ఆదాయం ఆగిపోయినా, వైద్య ఖర్చులు పెరిగినా, కుటుంబంలో అనుకోని అవసరం వచ్చినా వెంటనే అప్పుల కోసం పరుగులు తీయాల్సిన పరిస్థితి తగ్గుతుంది. అంతేకాదు, భవిష్యత్తు లక్ష్యాల కోసం చేస్తున్న పెట్టుబడులను కాపాడుకోవడానికి కూడా ఇది ఉపయోగపడుతుంది. సంపాదన ఎంత ఉన్నా పొదుపు లేకపోతే చిన్న సమస్య కూడా పెద్ద ఆర్థిక భారంగా మారవచ్చు. అదే క్రమంగా పొదుపు చేస్తూ అత్యవసర నిధిని ఏర్పాటు చేసుకుంటే అనుకోని పరిస్థితుల్లో కొంత ఆర్థిక స్వేచ్ఛ లభిస్తుంది. అందుకే ఆర్థిక ప్రణాళికను ప్రారంభించేవారు ముందుగా అత్యవసర నిధిపై దృష్టి పెట్టాలి. ఆ తర్వాతే తమ లక్ష్యాలు, ఆదాయం, రిస్క్‌ సామర్థ్యానికి అనుగుణంగా ఇతర పెట్టుబడులను ప్రణాళిక చేసుకోవాలి. కష్టకాలంలో ఆదుకునే ఈ నిధి.. కుటుంబ ఆర్థిక భద్రతకు బలమైన పునాది.
About the Author
