హైదారబాద్ః లక్షల్లో జీతాలు ఉంటేనే కోటీశ్వరులు కాగలరా? పెద్ద ఎత్తున పూర్వీకుల ఆస్తులు ఉంటేనే సంపద సృష్టించగలరా? అంటే కాదనే సమాధానం చెబుతోంది అహ్మదాబాద్కు చెందిన గిరీశ్ అగల్ విజయ ప్రస్థానం. కెరీర్ తొలినాళ్లలో నెలకు కేవలం రూ.2,500 వేతనంతో ఒక సాధారణ మెడికల్ రిప్రజెంటేటివ్గా అడుగులు వేశారు. ఎలాంటి ఆర్థిక నేపథ్యం లేకపోయినా.. నేడు 51 ఏళ్ల వయసులో రూ.6 కోట్ల భారీ నెట్వర్త్ (Net Worth) సాధించి ఔరా అనిపించారు. మ్యూచువల్ ఫండ్స్ (Mutual Funds), ఈక్విటీ స్టాక్స్ (Equity Stocks), రియల్ ఎస్టేట్ ద్వారా ఈ ఘనత సాధించారు. ఆయన సాధించిన ఈ సంపద వెనుక అదృష్టం ఏమాత్రం లేదు, అంతా ఒక పక్కా వ్యూహం, బలమైన ఆర్థిక క్రమశిక్షణ (Financial Discipline) మాత్రమే ఉన్నాయి. సామాన్య ఉద్యోగులు సైతం ఆర్థిక స్వాతంత్ర్యం (Financial Freedom) సాధించడానికి గిరీశ్ అగల్ జీవితం నేర్పే 7 కీలక పాఠాలు ఇవే.
కెరీరే మొదటి పెట్టుబడి
చాలామంది సంపాదన పెరగకముందే అడ్డదారుల్లో ధనవంతులు కావాలని చూస్తారు. గిరీశ్ మాత్రం తన తొలి ప్రాధాన్యం కెరీర్ ఎదుగుదలకే ఇచ్చారు. ఉద్యోగం చేస్తూనే దూరవిద్య ద్వారా ఎంబీఏ (MBA) పూర్తి చేశారు. కొత్త నైపుణ్యాలు పెంచుకుంటూ ఫార్మా రంగంలో అంచెలంచెలుగా ఉన్నత పదవులు దక్కించుకున్నారు. వేతనం వేగంగా పెరిగేలా శ్రమించడమే ఆయన ప్రయాణానికి బలమైన పునాదిగా నిలిచింది. కేవలం ఉన్న జీతంలోనే బడ్జెట్ వేసుకుంటూ కూర్చోకుండా.. సంపాదన సామర్థ్యం పెంచుకోవడమే (Income Growth) అసలైన సంపదకు తొలి అడుగు అని ఆయన నిరూపించారు.
జీవిత ఒడిదుడుకులకు తట్టుకునే ప్లాన్
2006లో అత్యుత్సాహంతో నెలకు రూ.7,000 చొప్పున సిప్ (SIP – Systematic Investment Plan) మొదలుపెట్టారు. అయితే 2008 గ్లోబల్ మార్కెట్ క్రాష్ (Market Crash) సమయంలో ఆయన పోర్ట్ఫోలియో ఏకంగా 70 శాతం కుప్పకూలింది. అదే సమయంలో హోమ్ లోన్, కార్ లోన్ ఈఎంఐలు, పిల్లల చదువుల భారం మీదపడటంతో భయపడి ఆ పెట్టుబడులను నిలిపివేశారు. తొందరపడి దూకుడుగా పెట్టుబడులు పెట్టడం కంటే.. ఎలాంటి క్లిష్ట పరిస్థితులనైనా తట్టుకునే ఆర్థిక స్థిరత్వం, ఎమర్జెన్సీ ఫండ్ (Emergency Fund) ఎంత ముఖ్యమో ఈ అనుభవం ఆయనకు నేర్పింది.
అప్పుల బంధనాల నుంచి విముక్తి
అప్పులు మిమ్మల్ని ఎప్పటికీ సంపన్నులుగా ఎదగనివ్వవు. గిరీశ్ ఈ నిజాన్ని త్వరగానే గుర్తించారు. మొదటగా తీసుకున్న గృహ రుణాన్ని పూర్తిగా చెల్లించిన వెంటనే.. 2011 నుండి మళ్లీ క్రమం తప్పకుండా మ్యూచువల్ ఫండ్స్ లో పెట్టుబడులు ప్రారంభించారు. 2020 కరోనా సమయంలో మిగిలిన అన్ని రకాల బ్యాంకు అప్పులను ముందస్తుగానే క్లోజ్ (Debt Clearance) చేశారు. అప్పటిదాకా ఈఎంఐల రూపంలో బ్యాంకర్లకు కట్టిన భారీ మొత్తాన్ని నేరుగా పెట్టుబడుల వైపు మళ్లించారు. ఈ ఒకే ఒక్క నిర్ణయం ఆయన సంపద నిర్మాణాన్ని రాకెట్ వేగంతో ముందుకు నడిపించింది.
జీతం పెరిగినప్పుడల్లా సిప్ పెంపు
మధ్యతరగతి ఉద్యోగులు చేసే పెద్ద తప్పు.. జీతం పెరిగిన వెంటనే లగ్జరీ ఖర్చులు పెంచుకోవడం. గిరీశ్ మాత్రం సరిగ్గా రివర్స్ గేర్ వేశారు. తన వేతనం పెరిగిన ప్రతిసారీ పెట్టుబడిని కూడా పెంచుకుంటూ వెళ్లారు. ప్రారంభంలో నెలకు రూ.7,000 ఉన్న సిప్ మొత్తాన్ని స్టెప్-అప్ (Step-Up SIP) వ్యూహంతో క్రమంగా నెలకు రూ.57,000 వరకు పెంచుకుంటూ పోయారు. ఆదాయం పెరిగినప్పుడు జీవన ప్రమాణాలను ఆడంబరంగా మార్చుకోకుండా.. పెట్టుబడి వేగాన్ని పెంచడం వల్లే కాంపౌండింగ్ (Power of Compounding) అద్భుతం సాధ్యమైంది.
డబ్బును నిరుపయోగంగా ఉంచొద్దు
చాలామంది భారీగా మిగులు డబ్బు ఉన్నా బ్యాంకు సేవింగ్స్ ఖాతాలోనే వదిలేస్తారు. అక్కడ వచ్చే అతి తక్కువ వడ్డీ ద్రవ్యోల్బణాన్ని (Inflation) కూడా దాటలేదు. 2016 నాటికి గిరీశ్ తన ఖాతాలో పోగైన దాదాపు రూ.25 లక్షల మిగులు నిధులను అలాగే నిరుపయోగంగా పక్కన పెట్టలేదు. సరైన ఆలోచనతో ఆ మొత్తం నిధులను ఒకేసారి లంప్సమ్ (Lump Sum Investment) రూపంలో ఈక్విటీ మ్యూచువల్ ఫండ్స్లో ఇన్వెస్ట్ చేశారు. ఆ నిర్ణయం కొన్నేళ్లలోనే ఆయన సంపదను భారీగా పెంచి పెద్ద రికార్డు సృష్టించింది.
మార్కెట్ క్రాష్: భయం కాదు, సహనానికి పరీక్ష
స్టాక్ మార్కెట్ ఒడిదుడుకులను చాలామంది భయంగా చూస్తారు. గిరీశ్ 2008లో భయంతో సిప్ ఆపేసి చేతులు కాల్చుకున్నారు. 2020లో కరోనా సంక్షోభం వచ్చి మార్కెట్లు దారుణంగా పతనమైనప్పుడు మాత్రం ఆ తప్పును అస్సలు రిపీట్ చేయలేదు. పోర్ట్ఫోలియో విలువ భారీగా పడిపోతున్నా ఏమాత్రం కంగారుపడకుండా పెట్టుబడులను యథావిధిగా కొనసాగించారు. మార్కెట్ దిద్దుబాటును (Market Correction) తక్కువ ధరల వద్ద యూనిట్లు కొనుగోలు చేసే అద్భుత అవకాశంగా మలుచుకున్నారు. మార్కెట్ మళ్లీ పుంజుకున్నప్పుడు ఆయన ఆస్తి విలువ అమాంతం పెరిగింది.
పర్ఫెక్షన్ కంటే స్థిరత్వమే ముఖ్యం
ఆర్థిక ప్రయాణంలో ప్రతి నిర్ణయం వంద శాతం కరెక్ట్ కావాల్సిన అవసరం లేదు. గిరీశ్ కెరీర్లో కూడా కంపెనీ ఇచ్చిన ఈసాప్స్ (ESOPs – Employee Stock Ownership Plan) సరిగ్గా వాడుకోకపోవడం, కొన్ని సందర్భాల్లో ప్రాపర్టీ లోన్లలో తడబడటం వంటి చిన్నచిన్న లోపాలు జరిగాయి. ఆయన ఆ తప్పుల దగ్గరే ఆగిపోలేదు. దీర్ఘకాలిక పెట్టుబడుల లక్ష్యం (Long-Term Wealth Creation) మీద దృష్టి పెట్టి, సరైన పొదుపు సూత్రాలను ఏళ్ల తరబడి స్థిరంగా పాటించారు.
నెలకు రూ.2,500 సంపాదించిన ఒక సాధారణ ఉద్యోగి రూ.6 కోట్ల సామ్రాజ్యాన్ని నిర్మించగలిగారంటే.. సామాన్యులెవరైనా సరైన ప్రణాళిక, సహనం, క్రమశిక్షణతో ఆర్థిక విజేతలు కావచ్చనడానికి గిరీశ్ అగల్ జీవితమే తిరుగులేని నిదర్శనం.
About the Author
